Abaana babiri omuri Bushenyi bateirwe enkuba bafeeraho

N’ebya Bruno Mugizi

BUSHENYI:

Pooriisi omu district eya Bushenyi eriyo necondooza oku abaana babiri bafiire bwanyima y'okuteerwa enkuba.

St.marys Kyamuhunga Primary School

Abafiire bamanywa nka Ainembabazi Maria, 7, omweegi wa P.1 na Ainomukama Augustine, 10, omwegi wa P.5, bombi abeegi ah’eishomero erya St. Mary's Primary School Kyamuhunga.

Abaana aba babaire bari abatuura b’ekyaro ekya Gongo Cell, Kyamuhunga Ward omuri Bushenyi.

Kurugiirira ahari pooriisi, eki kibeireho Orwakatano, 20.2.2026 nk’ahari shaaha 6 z’eihangwe obu abaana babaire nibataaha barikuruga kurya kyamushana haihi n’ekereziya eya St. Mary's Catholic Church Kyamuhunga, haihi n’eishomero ryabo. 

Aba bateirwe enkuba bafeeraho bwanyima y’enjura y’amaani egwire kumara eshaaha nkeibiri.

Pooriisi ehikire ahamwanya ogu nikwo kutwara emibiri y’abaana aba ah’eirwariro erya Kyamuhunga Comboni kukyeberwa.

Tayebwa Apollo, Omugambirizi wa pooriisi ahabw’ekyanga ekya Bushenyi empango naagira ngu okucondooza nikugumizamu.