Aakiibishopu Kaziimba atandikire kusibura abakuristaayo omukwetebeekanisiza okuhumura.

N’ebya Omushaki weitu

KIGEZI

Aakiibishopu w'ekanisa ya Uganda, the Most Rev Dr Stephen Kaziimba Mugalu atandiikire kusibura abakuristaayo omu kwetebeekanisiza okuhumura kwe. 

Kaziimba naija kuba nahuumura obwa Aakiibishopu omu kwezi kwa 8, 2027.

Ku abaire naburira omu kushaba kw’okuhendera orutaayaayo rwe rw'ebiro 4 orw'okusibura abakuristaayo b’omu burebeerezi bwa Kigezi, Dr Kaziimba ashabire abaikiriza okuhamira omu kushaba, okugira obumwe n'okukundana obwo ekanisa ya Uganda erikuronda oramuze omu bigyere.

Aakiibishopu ahamisiririize omugasho gw'obusingye omu kanisa nikwo kurabura aha kwebaganisamu n'okuryana okurikumara amaani omurimo gw'okuburira ekigambo kya Mukama hamwe n'emicwe y'abantu kusisikara.

Aakiibishopu Kaziimba ayebembiire ekanisa ya Uganda kuruga 2020.

Naija kuba nahuumura omu kwezi kwa 8, 2027 okurugiirira aha ngyenderwaho y'ekanisa ahi erikugamba aha kumurira ahamyaka 65.

Omu bigambo bye, Biishopu w’oburebeerezi bwa Kigezi, Rt. Rev. Gaddie Akanjuna asiimire Aakiibishopu Kaziimba ahabw'obwebembezi bwe burungi na munonga omu kurundaana esente z'okushashura amabanja n'okugaruzaho Church House, ekanisa ekaba niyo yagigiraho obujunanizibwa.

Ebyo bikiri aho, Omugambirizi w’ekanisa ya Uganda, Sadiiki Adams nagira ngu ba Biishopu mukaaga abarimu Rt. Rev. Dan Zoreka ow’oburebeerezi bwa Kinkizi, Rt. Rev. Assoc. Prof. Fred Sheldon Mwesigwa ow’obureeberezi bwa Ankole, Rt. Rev. Gaddie Akanjuna owa Kigezi Diocese n'abandi ni bamwe omu barikuza kuhuumura omu kwezi kwa 8, 2027.

#WestUpdates