668 batungire amabaruha diiguri na diipuloma ahari Ibanda University

N’ebya Stephen Nuwagira

Abeegi abamazire emishomo yaabo ah’itendekyero rya Ibanda University bahigirwe kworeka obwengye bw’ekika ky’ah’iguru hamwe n’omutima murungi ku baraatandikye kusherura emirimo na baagitunga.

Prof. Venancius Baryamureeba aine Minisita Evelyne Anite ahamukoro gw'okujweka abeegi ahari Ibanda University ebiro 08.12.2023. PHOTO: STEVEN NUWAGIRA

Obwo arikukira omukoro gw’okujweka abeegi aha Yunivasite y’Ibanda okw’omurundi gwa 7, Minisita w’eby’esente Evelyne Anite, ahigire abeegi kuza omurubaju orw’okwetandikiraho emirimo na munonga ey’eby’obushuubuzi omubwire bw’okutegyereza emirimo ya Gavumenti.

Anite agizire ngu hariho emirimo mingi munonga omubitongore eby’okureeberera abantu hamwe n’okuha obuheereza ahabw’abo abarikubaasa kubikoresa kutungamu sente abatarikwetaagisa sente nyingi kutandika.

Bamwe ahabeegi barikujaguza bwanyima y'okutunga amabaruha g'emishomo yaabo ahari Ibanda University ebiro 08.12.2023. PHOTO: STEVEN NUWAGIRA

“N’ahabw’ekyo mutashutama kutegyereza gavumenti kuba niyo yaaba obukomooko bw’entaasya. Muze omunsi mwegyerezeho n’agaanyu goona kandi mwetantare omuze gw’okugira ngu timurikumanyana n’abantu abarikwija kubaha emirimo,” nikwo Minisita agambeire abeegi ahamukoro ogubeire omutauni y’Ibanda.

Anite arabwire abeegi ahabunafu hamwe n’emicwe endiijo erikubaasa kubaremesa n’obubaraabe batungire amagyezi nk’okwegaita omubikoosi ebibi.

Arikugamba ahamukoro nigwo gumwe, Prof Venansious Baryamureeba, ashagikire abeegi kwongyera kutunga obukugu n’amagyezi omumyoga endiijo. “Mutamarwa na ka diiguri ninga diipuloma kamwe. Mweyongyereyo mutungye obukugu omumyoga yaanyu kwenda kuhayana n’abandi omukusherura emirimo,” nikwo ayongyeireho.

Okwebeisaho

Purofeesa Baryamureeba hamwe n’omuhwezi wa mukuru w’eitendekyero eri nabo bahabwire abeegi kwetandikiraho emirimo erikubareetera entaasya omumaka g’abazaire baabo reeru batunguukye mpora omubwire bw’okuteekateeka ngu emirimo eri omu tauni honka.

Abakuru babiri aba bagizire ngu okwebaisaho n’okukora eby’obushuubuzi nibihwera munonga kutunguura ebyanga obwo birikuhangaho emirimo ahabw’abaine eby’obushuubuzi hamwe n’abandi bantu b’ebyanga.

Omushuubuzi Patrick Bitature nawe ashabire abeegi kugumizamu nibeega kandi barikweyongyera kutunga obukugu omumyoga, agumize ngu omuntu naaba ow’omuhendo kurugiirira ahamagyezi agu aine. Ayongyeire yaabashaba kukoresa obwire bwabo ebintu ebintu eby’omugasho ahamagara gaabo n’okuba abeesigwa. Ogu agizire ngu okukoresa kurungi obwire bwabo hamwe n’obwesigwa nizo mpiiha 2 ezirikuhwera omuntu kutaho omusingye guhami ogurikumuhwera kuhika aharurengo orw’ahaiguru. 

Omushuubuzi rurangaanwa Patrick Bitature arikugambira abeegi ahamukoro gw'okujwara ahari Ibanda University omu tauni ya Ibanda ebiro 08.12.2023. PHOTO: STEVEN NUWAGIRA

Bwanyima y’okutandika emyaka 10 ehingwire, gubaire omurundi gw’okubanza Ibanda University kujweka omurundi ogundi abeegi abaaratungireho ekipapura kya University (Post-Graduate). Abeegi 66 batungire za diipuloma omumashomo g’eby’obwegyese, obwebembezi hamwe n’ag’eby’obushuubuzi. Ebicweka 59.2 ahari 100 by’abeegi 668 abajwaire babaire bari abaishiki/abakazi kandi 40 ahari 100 babaire bari abashaija.

Rev Canon Sandra Mwebaze, omwe ahari ba memba b’akakiiko akarikwebembera itendekyero eri ashabire abazaire kugumizamu nibahwera abaana abaherize emishomo yaabo na munonga abaraabe batakatungire mirimo. Omuheereza wa mukama ogu agizire ngu abaana abarikuba abatakatungire mirimo nibaba bari omukabi kahango kandi nibenda obushagiki bw’amaani omuby’emicwe kuruga omubazaire obwo barikugyezaho n’agaabo kusherura emirimo.

#WestUpdates