Ssemaka atemyetemye mukazi we gw'asuubirizza okumwendako n'amutta!

OMUVUBUKA avudde mu mbeera, n'atema mukazi we ebiso ebimusse n'omusajja gw'abadde ateeteera naye, n'amutemako engalo bbiri.

Bibadde ku kyalo ky'e Lusengejjo mu kibuga ky'e Butemba mu disitulikito y'e Kyankwanzi , Fesito Nkurunziza 25, gy'agambibwa okutemera mukyala we Anonia Nyirahabimaana 40, ebiso ku mutwe n'afiira mu ddwaaliro.

Nkurunziza eyasse mukazi we

Kitegeezeddwa nti, bano bombi nzaalwa y'e Rwanda era nga babadde bakolera mu kitundu ekyo, emirimu gya lejjalejja.

Kigambibwa nti bino okutuukawo, Nkurunziza , yamaze kufuna mawulire, nga mukazi we ono ow'abaana abasatu, bwe yabadde apepeya  n'omusajja omulala mu bbaala emu mu kitundu .

Omwogezi wa poliisi mu Wamala, Lamerk Kigozi, agambye nti , yabase ejjambiya  wakati mu busungu, n'abalumba mu bbaala, n'atema omukazi ebiso ku mutwe n'omusiguze n'amutemako engalo bbiri.

Ayongeddeko nti omukyala , baasobodde okumuddusa mu ddwaaliro gy'afiiridde enkya ya leero, era Nkurunziza bamukutte, akuumirwa ku poliisi e Kyankwanzi, nga bamuguddeko ogw'obutemu.