Aba Youth Wealth Creation beeweze obutazikiza kunoonyeza Pulezidenti Museveni kalulu

Aba Youth Wealth Creation mu Makindye baweze nti tebagenda kuzikiza kya kunoonyeza Museveni akalulu ku ‘ground’ okutuusa nga bakakasizza nti amaze okuwangula.

Bannakibiina kya NRM mu munisipaali y’e Makindye, bakung’aanye okutema empenda okulaba butya bwe basobola okukozeza enkola ya muntu ku muntu okwetooloola ekitundu nga basaggulira pulezidenti Museveni akalulu naddala mu bitundu bya Kampala.

Bano be bamu ku bantu abangi abakola emirimu gya wansi abaaganyulwa mu pulogulaamu ya maka g’obwapulezidenti ey’okukwasizaako eya Youth Wealth Creation ng’ekulirwa Faisal Nsase neewagirwa amaka g’Obwapulezidenti okuyita mw’agavunaanyizibwako Jane Barekye.

Ndase agamba nti okukola kino banoonya engeri entuufu ey’okwebazaamu pulezidenti Museveni naddala okwagala abantu ba wansi n’ategeeza nti abantu bano abasoba mu 300, abakungaanye olunaku lwa leero ku Calendar e Makindye nga buli muntu yeeyamye okukka ku ‘ground’ okukuyega abalonzi 10 ekitono balonde pulezidenti Museveni ne NRM yonna mu Kampala awangulire waggulu.

Ndase akuutidde Bannamakindye, okusooka okuzza enjawukana zonna ze balina ebbali, amaanyi basooke bagazze ku ky’okunoonyeza pulezidenti Museveni akalulu kubanga ono bw’awangula obumulumulu obubadde bubaviirako okweteemateema aba abumala.

Bano bagamba nti okuyita mu pulogulaamu za gavumenti ez’enjawulo ezitunuulira okusitula embeera z’omuntu wa wansi ng’eno eya Youth Wealth Creation, embeera zaabwe mu byenfuna zikyuse era eno ye nsonga lwaki balina okulaba nga Museveni awangula addemu abasindike bayongere okukulaakulana.

Bano era beeronzeemu n’obukulembeze obugenda okubakulembera mu kkampeyini eno, nga Robert Lwasa, gwe balonze okubakulembera era obukulembeze buno bwennyini bwe bamaliriza okukakasa nti Museveni azzeemu okukulembera eggwanga bo bagenda okwekolamu SACCO ng’abantu abakola emirimu gya wansi pulezidenti bw’amala okulayira abateeremu ssente beewole bawone embeera ya ba ‘money lender’.

Ssentebe wa LC2 e Makindye, Wasswa Masasi, ategeezezza nti ye ng’omukulembeze musanyufu okubeera ng’abantu b’e Makindye ku mulundi guno boogezza eddoboozi limu okuwagira NRM era suubira nti ku luno NRM yaakweriisa nkuuli mu Makindye okusinga bwe gubadde emyaka egiyise.

Bano nga tebetemyemu, basiimye akulira amaka g’obwapulezidenti Jane Barekye olw’okuwagira pulogulaamu ezitunuulira omuntu wa wansi naddala eno eya Youth Wealth Creation ate n’atakoma okwo n’agikwasa omuntu ow’amazima Faisal Ndase y’aba agikwasaganya ng’agitambuzza obulungi obutagambika.