Nakato leka, tweliire..., Nakato leka, tweliire obulo bwaffe obw’obulamu... ishi ishi tweliire, ishi ishi tweliire obulo bwaffe obw’obulamu? Owaaye, ndaba oyimba bw’otunula mu kinu kyange! Tebaakukubira kulingiza?

Nsonyiwa nnyabo. Naye osekula biki?

Nsekula binyeebwa kuba bimpoomera nnyo nga mbifumbiddeko ettooke.

Mwana ggwe anti weeyogeza nnyo! Ku bulungi bw’oliko n’ezo enjala ezaakuwanvuwa, oyinza okukwata mu manda oba okufukamira mu vvu mbu oseesaamu?

Eky’okubeera n’enjala tekinzigyako kubeera mukyala wa buvunaanyizibwa.

Nawadi Ng'anyumye Mu Kiteeteeyi.

Ebyo kale tubiveeko. Ali atya oyo?

Ssenga wange Lilian Namatovu, gy’ali mulungi.

Tonnee-kolezaako. Nze hhamba akugobako ebiwuka nga bikuwalampa ekiro. Aliyo atya?

Bw’oba ogamba musajja, simulina. Nabawummulamu.

Mbu gwe osobola okukeera ku makya n’otukakasa nti ku bulungi bw’oliko eby’omukwano wabyesonyiwa?

Nakoowa okunjiwa. Abasajja mulumya. Omuntu akuwa laavu enzijuvu kyokka n’ogiyiwamu obuugi.

Kati lwaki totwalamu nze atanywa buugi nti bunansimattuka ne buyiika mu laavu yo?

Gwe nkulaba obitaddemu omuzannyo. Naye tofaayo, nja kufumbirwa nga nfunye omusajja omwetegefu okumpasa.

Mbuulira ku mannya go gonna ndabe oba tetweddira muziro gwe gumu.

Nze Fabiolah Tricia Nawadi.

Mbuulira ne gy’obeera n’omulimu gw’okola ndabe oba togenda kummenya nga tutandise okubeera ffenna?

Mbeera Kagoma, ntunda bizigo by’abakyala n’ebyokwekolako.

Kiki ekisinga okukusanyusa ng’obadde n’omuntu mu laavu?

Omuntu okundowoozaako n’ampa nga simusabye. Bw’ati, aba asaana kafo ka njawulo mu Ggulu nga kalimu ne AC.

Kiki ekikunyiiza n’ofunya n’ebikonde?

Saagala muntu annimba. Okunnimba waakiri onvuma.

Kika kya musajja ki ky’otoyinza kuganza ne bwe bakuteeka ekiso mu bulago?

Sisobola kwagala musajja avuga bodaboda oba ttakisi.

Kati maama bw’oba waakunjagala, bintu ki by’oyagala mu musajja nneetunulemu ndabe oba naabisobola?

Olina okuba n’empisa, omulimu gw’okola nga tegwekuusa ku gwa boda oba ttakisi, ng’olina eddiini ate ng’oli mulungi.

Muze ki gwe walina mu buto?

Nalina nnyo emputtu era yankubyanga nnyo.