Munna FDC Sarah Eperu afudde n’obulumi
Apr 09, 2024
OMWOGEZI wa FDC omukyala mu Uganda, Sarah Eperu afudde alina obulumi bw’ekibiina kye ekyadobonkana.
Sarah Eperu
Munamawulire
Munamawulire @Bukedde
OMWOGEZI wa FDC omukyala mu Uganda, Sarah Eperu afudde alina obulumi bw’ekibiina kye ekyadobonkana.
Sarah abadde munna FDC kakongoliro okuviira ddala ku mulembe gwa Sam Njuba era
abaddewo nnyo ne ku mulembe gwa Dr. Kiiza Besigye.
Wafula Ogutu omukadde we kibiina kya FDC era eyaliko omwogezi w’ekibiina kya FDC agambye nti omugenzi abadde anywerera ku kigambo kye, abadde bw’asuubiza atuukiriza, yekkiririzaamu ng’alwanirira nnyo ekibiina kye.
Suzan Eperu muganda w’omugenzi agambye nti Sarah Eperu yafudde bulwadde bwa nsigo. Alese abaana 4 okuli abawala n’abalenzi. Yagambye nti muganda we obulwadde bwamutabukidde ku Ssande n’atwalibwa mu ddwaaliro lya Life link e Kyaliwajjala
gye yafiiridde, omulambo gwe ne gwongezebwayo e Mulago.
Yazaalibwa mu 1963 ku kyalo Kapiri – Koloin mu disitulikiti y’e Ngora era gy’agenda okuziikibwa ku Lwomukaaga.
Olumbe lukumiddwa mu maka ge e Kireka ng’omulabo gujja kuleetebwawo ku Lwokusatu ate ku Lwokuna gutwalibwe ku St. Jude e Naggulu
No Comment