Green Schools ; Mubende Army School banyiikiridde okulwanyisa pulasitiika n’okusimba emiti

Mubende Army SS mu disitulikiti y’e Mubende okukuuma obutonde bw’ensi obutiribiri kwabayingiza mu pulojekiti ya “Green Schools’ kubanga yabasanga beetegefu era baayongerezaako bwongereza ku byababangulwa.

Abayizi nga balaga ebisero mwe basuula kasasiro bye bakola mu bucupa.

Honest Kansiime, akulira pulojekiti eno mu ssomero lino ate nga musomesa w’amasomo ery’okubala ne Geography bino by’atunnyonnyodde: Mubende Army SS, ssomero erisangibwa mu Mubende Munisipaali ng’okuva e Mubende mu kibuga waliwo kkiromita emu okulituukako.

Essomero lino lyasooka kubeera lya bibaati na biwempe ne bajja nga balizimba mpola mpola. Wabula nga terinnazimbibwa bulungi abaamagye abaaliwo mu kiseera ekyo baasooka kusimba miti okulyetooloola.

Essomero lino lyatandikibwawo bannamagye era nga pulezidenti Museveni ye yawomamu omutwe litandikibwewo n’ekigendererwa eky’okuyamba ku baana b’abaserikale abalina obulemu ku mibiri gyabwe abaalinga mu nkambi eno ey’e Mubende.

Abayizi mu lukuηηaana lwabwe batuula ku muddo wansi w’ebisiikirize by’emiti egijjudde essomero.

Mu kusooka ekibangirizi kino kyeyambisibwanga abaserikale abamu okulimirako emmere yaabwe era nga kwaliko essomero lya pulayimale naye baakizuula nga ne siniya yeetaagisa.
Pulezidenti kye yava asalawo bateekewo ne siniya era ne litandika mu mwaka gwa 2000. Essaawa eno essomero liwa essuubi kubanga obutonde babukuumidde ddala.

BAKOLA KU KIZIBU KYA PULASITIIKA
Mu kusooka nga tebannabangulwa, baalina ekizibu kya pulasitiika era nga tebakiraba nga kizibu kya maanyi.

Naye oluvannyuma lw’okwetaba mu mpaka zino,baatandikirawo okukola
eby’omugaso mu bucupa buno n’obuveera era nga kati we twogerera balina we batuuse.

Omusomesa Honest Kansiime

BATONDAWO GREEN CLUB
Oluvannyuma lw’okukiraba nti, si kyangu kya kuyingiza mu buli muyizi mu pulojekiti eno, twasalawo ne tutondawo Green Club era abagiyingira be bawalirizza abalala okugiyingira kubanga bye tukola tetukoma ku kubikola bukozi wabula muvaamu ne ssente kubanga tubiguza abantu abalala.

Pulojekiti baagitegeerera mu mawulire era ne balondebwa oluvannyuma ne beetaba mu mpaka.

Bwe twamala okubangulwa,twakiraba nga ekizibu ekibadde ekinene kya bucupa ate nga tusobola okubukolamu ebisero mwe tusuula kasasiro era ye pulojekiti gye tukyasinze okuteekako essira.Tebakoma okwo, baagala n’okuzimba ekikomera nga kikoleddwa mu bucupa.

OKUSOOMOOZEBWA 
Oobucupa wadde tubufuna olw’abaana abangi ku ssomero ababukozesa, naye weesanga ng’ebikozesebwa ebirala bye tulina okukozesa okusobola okukola bye bakuηηaanyizaamu kasasiro byetaagamu ku ssente oluusi ezitabaawo.

Ekirala olw’ensonga nti, pulojekiti mpya abayizi abasinga baalemwa okugitegeera wadde nga tugezezzaako okugibasomesa. 

ABANTU ABABEETOOLODDE BABAYIGIDDEKO
Wadde nga batunuuliddepulojekiti y ’obucupa naye n’abantu babasomesezza okusimba emiti n’okwewala okusuula obucupa n’obuveera era bakitadde mu nkola.