Ayiekoh asuddewo ogwa Maroons mu Big League
May 18, 2021
OLUVANNYUMA lw’emyezi 13 gyokka nga Charles Lukula Ayiekho ye mutendesi wa Maroons FC eya Big League, omulmu gumuzitooweredde n’asaba bannyini ttiimu bamute agende.
Ayiekoh asuddewo ogwa Maroons mu Big League
Ayiekho amanyiddwa nga ‘Mbuzi’ yeegatta ku Maroons mu March 11,2020 ng’adda mu bigere bya Douglas Bamweyana. Wabula bukya abeegattako embeera buli lukya ezze esajjuka, afunye wiini bbiri zokka mu mipiira 10 n’amaliri ga mulundi gumu.
Ku Ssande ekitundu kya Big League ekyokubiri kyaggyiddwaako akawuuwo nga Maroons ekubwa Paidha Black Angels (1-0) ku kisaawe kya Borokoro e Zombo. Guno gw’abadde mulundi gwa kutaano ogw’omuddiring’anwa nga Maroons ekubwa mu Big League, kw’ossa okukubwa KCCA FC awaka ne kubugenyi mu kikopo kya Stanbic Uganda Cup.
Abazannyi ba Maroons
Ayiekho agamba nti omutindo ogw’ekiboggwe ttiimu kw’eri guviira ddala ku mivuyo, okusika omuguwa n’obutakkaanya obuli mu bakungu ne bannyini ttiimu omuli ne bannakiggwaanyizi abaagala okuttattana erinnya lye era awulira akooye.
“ Ndi mutendesi alina erinnya, okukolera mu mbeera bweti sisobola kukiguminkiriza, ky’ekiseera ng’ende mu mutima mulungi nkole ebirala okutaasa erinnya lyange kuba ebigenda mu maaso mu ttiimu tebiwoomesa nnakabululu,” Ayiekho bwe yategeezezza.
Ayiekoh Charles
Wiiki bbiri emabega Maroons yawa okulabula abazannyi okuli; Emmanuel Akol, Solomon Walusimbi, Silvester Okello ne Eddy Kapampa, Rogers Teziggwa, abakungu okuli; Steven Ekidu, Allan Anguyo, Justin Akol n’omusawo wa ttiimu Lilian Nansikombi.
Nga bano kigambibwa nti babadde bazannya kifiiriza okulaba ng’omutendesi Ayiekho alemererwa omulimu, ekitongole kisobole okukomyawo Asaph Mwebaze eyaliko omutendesi wa Maroons gye buvuddeko.
Pius Bamwange akulira emirimu mu Maroons agamba nti ensonga zino zeetaaga abakungu ba ttiimu bonna okutuula okukola okusalawo kuba n’abamu babiwuliridde mu mawulire, obubaka obutongole tebunatuuka ku mmeeza zaabwe.
“Tukyekkenneenya ensonga zino n’oluvannyuma tuveeyo n’okusalawo okw’enkomeredde,” Bamwange bwe yatangaazizza. Maroons y’eddiridde asembye mu kibinja kya Rwenzori n’obubonero 7. Bazzaako kukyaza Gaddafi FC enkya Lwakuna e Luzira.
No Comment