"Ono omukyala yasukka obwenzi, nze sigenda kukkiriza kujoogebwa bwentyo, era nsaba gavumenti nga mpita mu minisita w'abavubuka n'abaana, Florence Nakiwala Kiyingi annyambe bakebere abaana bano ababiri abasembayo ku baana omukyala ono b'azaala kubanga siyinza kulabirira baana batali bange," bwatyo Godfrey Zziwa omutuuze w'e Kiwumu Kalambi ku luguudo lw'e Mityana bwe yategeezezza.

Zziwa okuvaayo kiddiridde mukyala we Getrida Nakalembe gw'agamba nti yeekobaana ne ssezaala we, (taata wa Zziwa) ayitibwa Yekoyasi Ssenyonga ne bamutwala ku poliisi e Buloba nga bamuvunaana okusobya ku muwala we omukulu gw'amuzaalamu era nga n'omusango gukyaliyo.

Yayongeddeko nti yatandika okwekengera mukyalawe oluvannyuma lw'abantu ab'enjawulo okundeetera amawulire nti abamu ku baana be mpita abange ndabirira baana ba balala. ‘Nabibuuza mukyala wange n'abyegaana era ne nsalawo okubatwala babakebere.

Nga May 17, 2014, nafuna essimu okuva ku kkooti e Kakiri nga bantegeeza ng'ebyavudde mu musaayi bwe bakomyewo era mbinone ku kkooti e Kakiri wabula neewubaayo okumala enfunda eziwera nga tewali ayagala kuntunulako wadde.

Oluvannyuma byampeebwa kyokka nga tebikwatagana na myaka gy'abaana gye mmanyi emituufu.

"Okumanya omukyala ono anjooze, yatuuka n'okungattika n'abasajja abawera ku kyalo ne mbigumira wabula bwe kyatuuka okungattako kitange ne nsoberwa.

Taata aludde nga yeekulubeeseza mu maka gange ne muto wange Ssebunnya gwe nasuzanga.

NAKALEMBE ABIWAKANYIZZA

Nakalembe eyasangiddwa mu maka gaabwe ne Zziwa yagambye nti bino byonna bba by'ayogera bya bulimba era agenderera kumuswaza mu bantu. "Naye ate okunjagaza ssezaala wange ampeebudde nnyo.

Nze simanyi kyatuuka ku baze kubanga awatali kumuwaayiiriza nze kennyini namusanga ng'asobya ku muwala waffe omukulu nga n'omusango gukyali ku poliisi y'e Buloba, era nga n'abekika kye, baagezaako okumutuuza ne balemwa," bwatyo Nakalembe bweyategeezezza.

Yayongeddeko nti okuggyako nga Zziwa ensonyi z'okusobya ku mwana waffe ze zimukwata naye nze bukyanga mmufumbirwa sirabankanangako era nsuubira akimanyi era obwenzi yabukola ng'omuntu kubanga mu kiseera kino yanoba dda mu maka gaffe takyasulawo.

Okunsibako obwenzi ayagala nve mu maka gano naye sijja kubanga ga baana bange era twagazimba ffembi.

MUZEEYI SSENYONGA KYAGAMBA

"Zziwa namuzaalukuka sikyamutwala nga mutabani wange oluvannyuma lw'okunjagaza mukamwana wange. Abaana bange n'abazzukulu n'abantu bonna bawulira batya nti nayagadde mukamwana wange?" Ssenyonga bwe yategeezezza.

"Nsaba bwe babeera bakebera abaana bano omusaayi ne Zziwa bamukebere obwongo kubanga simanyi kyamutuukaako okutuuka n'okusobya ku muwala we," bwatyo Ssenyonga bwe yawunzise.

Buganda Prince Arnold Simbwa passes on

Simbwa was the son of Prince David Golooba, the elder brother of Kabaka Ronald Mutebi.

Buganda Prince Arnold Simbwa passes on

By NewVision Reporter

Journalists @NewVision