W’afiiridde nga yaakawangula omusango mu kkooti ng’eragidde bbanka okukkiriza beekebejje akawunti za Sudhir Ruparelia ku ngeri gye yagulamu ekizimbe kya Simbamanyo okuva mu Equity Bank.

Kino kibadde kimuwadde essuubi ly’okuwangula omusango ng’alumiriza nti kkooti ejja kuzuula nti byonna byakolebwa mu bukyamu.

Kamya yafiiridde Kenya mu Nairobi Hospital gy’amaze ennaku oluvannyuma lw’okulwalira akabanga.

Kitutte ekiseera nga battunka mu musango gw’okununula ebizimbe bye okuli; Simbamanyo House mu Kampala wakati ne Afrique Suites Hotel e Mutungo
mu Nakawa.

Ying. Peter Kamya, abadde mukubi wa pulaani z’ebizimbe ate mukyala we ye Dr. Margaret Muganwa era amaka gaabwe gali Mutungo mu munisipaali ye Nakawa mu Kampala.

We twatuukidde mu maka g’omugenzi twasanzeeyo bakozi ne bategeeza nti baabagambye yafiiridde Nairobi kyokka tebamanyi bisingako awo.

Munnamateeka we, Robert Friday Kagoro owa Muwema and Co Advocates yakakasizza nti kituufu Kamya yafudde kyokka ebikwata ku ddwaaliro n’obulwadde yabadde tabirina wabula nga famire yabadde ekola ku nteekateeka z’okukomyawo omulambo.

Ensonda zaategeezezza nti Kamya yatandika okulwala gye buvuddeko ng’alumizibwa mu lubuto n’ekifuba ne bamujjanjabira mu Uganda kyokka w’afiiridde wabadde waakayitawo ennaku bbiri nga bamututte e Kenya okufuna obujjanjabi obusingako.

Kamya ye nnannyini kkampuni ya Simbamannyo Estates eyali nannyini kizimbe kya Simbamanyo House ku Lumumba Avenue ky’aludde nga bakaayanira ne kkampuni ya Meera investments, eya Sudhir Ruparelia eyakigula okuva mu Equity Bank, Kamya gye
yali akisinze nga yeewola obuwumbi 29 bbanka bwe yagamba nti bw’amulemerera okusasula.

Ye yali nnannyini Afrique Suites Hotel e Mutungo nakyo bbanka yakitunda ku nnyondo.

OLUTALO NGA BATWALA SIMBAMANYO

Embeera yatandika okumwonoonekera nga Equity Bank eraze nti ssente zeyeewolayo obuwumbi 29 zimulemeredde okusasula.

Ebyobugagga bye yasingayo baabiranga ne bitundibwa ku nnyondo.

Yaddukira mu kkooti emutaase ne kitasoboka n’agenda n’ewa Pulezidenti Museveni.

ADDAYO MU KKOOTI ENKULU

Byonna nga bimuzitooweredde, yazzeeyo mu kkooti enkulu ey’ebyobusuubuzi n’ateekayo omusango ku nnamba 0583/2022 ng’awawaabira Equity Bank, LuwaLuwa Investments limited, omuwandiisi w’ebyapa ne Katende Ssempebwa & Co. Advocates.

Yabadde awakanya engeri bbanka gye yatunda eby’obugagg abye okuli;

l Simbamanyo House esangibwa ku LHR Volume 2220 Plot 2 Folio 33 Lumumba Avenue
l Afrique Suites Hotel e Mutungo etudde ku Kyadondo Block 243 Poloti; 95, 487, 957, 958 ne 2794 bye yali asinze mu Equity Bank nti baabitunda mu ngeri emenya amateeka.
Kamya yasabye kkooti n’ekkiriza bagende mu bbanka eyo bakebere akawunti za Sudhir ne email ze baawaanyisiganya. Omulamuzi Steven Mubiru mu nsala gye yawadde nga August 9, 2022 yakkirizza okusaba kwa Kamya.

Abawawaabirwa mu musango guno baddukidde mu kkooti ejulirwamu ne bawakanya ensala ya kkooti enkulu ne basaba ekiragiro okuyimiriza okuteeka mu nkola ensala eno nga bwe balinda okuwulira omusango oguwakanya gwe baataddeyo.

Omulamuzi Cheborion Barishaki mu nsala gye yawadde nga October 19, 2022 yayimirizza okuteeka mu nkola ebiragiro ebiri mu nsala y’Omulamuzi Stephen Mubiru.
Ekizimbe kya Simbamanyo ku George Street / Lumumba Avenue mu Kampala, eyakigula yakikyusa erinnya n’akituuma Gender and Labour House.

PULEZIDENTI MUSEVENI ABIYINGIRAMU

Famire y’omusuubuzi Peter Kamya ne mukyala we Dr. Margaret Muganwa beekubira enduulu ewa Pulezidenti Museveni ne bannyonnyola byonna ebyaliwo okutuuka okutunda ebyobugagga byabwe.

Mu bbaluwa, baategeeza Pulezidenti nti bbanka ya Uganda enkulu yali eyimirizza bbanka z’ebyobusuubuzi okutunda eby’obugagga by’abantu mu kiseera kya Covid 19 kyokka nakyo bbanka teyakigoberera ne batunda ebyobugagga ku muwendo ogutabigyamu.

Kamya yategeeza nti newankubadde yatuukirira bbanka ng’agisaba waakiri emuwe omukisa aleete omuguzi owuwe, nakyo bbanka yakigaana n’ebiguza Meera Investments.

MUSEVENI AYANUKULA KU BBALUWA YE

Nga September 3, 2021 Pulezidenti Museveni yawandiika ebbaluwa, n’ategeeza nti Kamya ne mukyala we beekubidde enduulu gyali ayingire mu nsonga z’ebintu byabwe okuli; Simbamanyo House ne Afrique Suites Hotel, Equity Bank bye yatunda olw’ebbanja. Yalagira wabeerewo okuddamu okukola okunoonyereza bamuwe lipooti asalewo ekiddako.