Maneja Jamal ssaalongo Bk ne Rozella basambye akaggi

Wadde abayimbi bakoseddwa omuggalo gwa Covid 19, abamu ku bamaneja abanene basigadde batambuza ekintu n’okukola ennyimba eziremezza abayimbi baabwe ku maapu.

Mu bano mulimu Maneja Jamal aleese Rozella ne Ssaalongo BK abafuuse ensonga ennaku zino.  Abalala kuliko: Jeff Kiwa eyali akola ne Sheebah ne baawukana nga kati awanise Pinka ne Sama Sojah ne Calm Ivan akola ne Pallaso.

Maneja Jamal

Jamal ng’amannya ge amatuufu ye Benjamin Kalyesubula yasooka kukwata ku Bafana Bafana, Sama Sojah ne Young Mulo nga kati akola ne BK Music Empire etendeka abayimbi n’abazinyi. Yategeezezza nti Rozella alina ennyimba bbiri okuli: Ntaawa ne Guluma ez’omukwano ate Ssaalongo BK alina: Nsiima, Muweelawo ne Bye nkwagala.

Nsiima luyimba lwa Ngoma Ng’anda nga yeebaza Mukama Katonda azaaza n’abagumba okumubeererawo mu buli mbeera n’awera okufiira ku muntu yenna amuwalana.

Ssaalongo BK ne Razel

Ate Muweerawo agezaako okuwaana embooko y’omuwala ng’agamba nti  buli kyayoya ajja kukimuwa kubanga tayagala afune nkalamata n’okwegombagomba wadde okufuna omuntu amunyiiza.

Rozella ne Ssaalongo bazze bayimba kyokka zino ennyimba ze zibayambye okusamba akaggi ne batandika okuvuganya abayimbi abanene abaluddewo. Rozella yayimbirako mu Da Nu Eagles.

Ennyimba zino baazikwatidde mu Sabula Mooto Studio e Makindye ate vidiyo ne bazikolera mu Ziga Pix