Abasiraamu e Masaka balaajanidde gavumenti ku misolo

Bya TONNY KALYANGO

ABASIRAAMU e Masaka beeyambisizza okusaala Iddi ne basaba gavumenti empya eyalayiziddwa ku Lwokusatu okukkakkanya emisolo egyateereddwa ku mafuta kubanga gigenda kuviirako okupaaluka kw’emiwendo gy’ebikozesebwa mu bulamu obwabulijjo.

Bino bibadde mu bubaka bwa Sheikh Twaha Bugembe omukulu w’Ettwale lye Masaka bw’abadde abuulira oluvannyuma lw’okusaala Esswala ya Iddi eyakulembeddwa Sheikh Abdul Baskhi okuva mu ggwanga ly’e Misiri mu kibangirizi kyomuzikiti omukulu mu kibuga Masaka.

Ono era yeekokkodde ekigobaganya bantu ku ttaka ekifudde abantu bangi emmombooze mu nsi yaabwe.

 Alaze n'okutya olw’okutyoboola obutonde bw’ensi ng’ ebibira n’entobazzi ebisaanyizibwawo abagagga ekyolekedde okufuula eggwanga lino eddungu n'asaba gavumenti eteekewo enkola ekyusa bino.

Disitulikiti Khadhi wa Masaka, Sheikh Swaib Ndugga yagumizza Abasiraamu ku butakkaanya obubaddewo ku muzikiti guno nga buva ku Basiraamu abamu abaavaayo ne batiisatiisa Imaam w’Omuzukiti guno Abbas Nseera ekyavaako olutalo olw’amaanyi nti bukwatiddwa bulungi.

Omumyuka wa Pookino, Mwalimu Abdallah Kato alabudde abantu abakumpanya ettaka lya Kabaka mu kibuga Masaka nti tebajja kubatunuulira butunuulizi.

Abadde mmeeya w'ekibuga Masaka, Godfrey Kayemba Afaayo yasiibudde abasiraamu mu butongole n'abeebaza okumuwanirira mu buweereza bwe.

Yeeyamye okusigala ng’ akolagana nabo kyokka yabasabye okusabira abagenda okumuddira mu bigere ate bakolagane nabo okusobola okwongera enkulaakulana ya Masaka gyalese atandiseeko.