Engeri gy'okuumamu mmotoka etatambula nga nnamu

ENNAKU zino olw’ebyenfuna ebikalubye abantu abamu basazeewo okutuuza emmotoka.

Oyinza okwesanga nti oluvannyuma lw’ebbanga nga emmotoka tetambula lw’oddamu okussaamu ekisumuluzo eyinza okugaana okwaka. Obutafuna bizibu bino waliwo by’olina okukola okukuuma emmotoka yo nga nnamu.

Peter Teira omukugu mu kuwa ebidduka ssaavisi agamba nti mmotoka ebadde ekola oba eyakolako, buli lw’ebeera mu kifo kimu nga tekola okumala ebbanga eddene, fuba okulaba nga ttanka y’amafuta nzijuvu.

Makanika nga yeekebejja mmotoka.

Buli lw’ogitereka nga ttanka ya kitundu, ekibangirizi awatatuuka mafuta kituuyana, ne kikola obutalavvu, entuuyo ne zikulukuta n’obutalavvu nga byetabika mu mafuta. Lwoddamu okugikoleeza obukyafu bujja kutambula n’amafuta bwonoone sisiteemu yonna ekiyinza okwetaagisa ssente nnyingi okugiyonja.

Kyandibadde kya makulu okutereka mmotoka yo oluvannyuma lw’okukyusa woyiro waayo n’oteekamu omulongooseemu oba omulunge (Synthetic oil). Eky’enjawulo ku woyiro ono, alwawo okukutukakutuka oba okwonooneka okwawukanako ne woyiro owa bulijjo. 

Woyiro owa bulijjo atwala ebbanga lya myezi esatu gyokka okwonooneka ssinga mmotoka mw’ali ebadde tekola, kyokka woyiro omulongooseemu amala emyezi 6 n’okweyongerayo nga tayonoonese kutta byuma bya mmotoka.

Woyiro omulongooseemu ayambako ssinga mmotoka ebeera mu kifo ekinnyogovu wabula olina okwegendereza ssinga mmotoka yo nkadde, kyusa woyiro oluvannyuma lw’omukugu okuggyekebejja kuba waliwo essa lya mmotoka nga woyiro omulongooseemu ajja kwongera kutta byuma kuba wa maanyi.

Mmotoka gigerere akaseera ogivugemu, tokoma ku kugitokosaamu. Givugemu buli luvannyuma lwa wiiki emu. Abagikoleeza ne bagireka mu kifo kimu ng’etokota, kino si kituufu, abamu bateeka ekigere ku muliro n’agivuumya okumala ebbanga, kino kitta ‘Pistory rings’ nakyo si kituufu. Bino byombi bibugumya yingini yokka, kyokka buli lw’etambulamu, sisitiimu ya mmotoka yonna ekyamuka.

Taasa omuliro oguli ku bbaatule y’emmotoka ng’ogikuulako ebikondo oba okugiggyamu yonna n’ogiteeka ebbali. Era mu mbeera y’emu, totereka bbaatule ng’erimu asidi waayo. Bwasigalamu akutula ebisenge. Kirungi ogitereke ng’ojoozezza munda, ekiseera bwe kituuka okugikozesa oteekemu asidi omupya.

Fuba okulaba ng’okebera ku mipiira gy’emmotoka buli lunaku, ssinga okizuula ng’omukka gukendedde, yongeramu ojjuzeewo, gezaako obutagipakinga awatali ssementi, ssinga oluggya lwa ttaka, funa amayinja oba embaawo emipiira kwe giba gibeera. 

Buli lwe gituula ku ttaka obuuma obukola emipiira bukaddiwa mangu oba bunafuwa. Jjombwe agamba nti emmotoka gitereke ng’erimu ‘engine Coolant’ sso si mazzi gokka. Buli bw’ebeeramu amazzi gokka ate nga tekyatambula, amazzi gagireetera okutalagga munda.