Engeri gy'okola wayini n'ebizigo mu butiko
OKUGATTA omutindo ku butiko gwe gumu ku misomo egigenda okubeera mu mwoleso gwa Harvest Money n’ekigendererwa ky’okutonderawo abantu amakubo g’okugaziya ennyingiza okweggya mu bwavu.
Engeri gy'okola wayini n'ebizigo mu butiko
By Herbert Musoke
Journalists @New Vision
Okusinziira ku nteekateeka y’emisomo, gwakubeerawo ku Lwomukaaga nga March, 19, Abel Kiddu omuwanguzi w’empaka z’omulimi asinga mw’agenda okusomesereza okulima obutiko n’okubugattako omutindo okugaziya ennyingiza.
“Obukito kimu ku bisinga obwangu okulima kuba weetaaga kapito mutono ddala kyokka ng’osobola okufuniramu ddala ssente eziwera n’okugaggawala. Nze nalina omulimu gwa bwayinginiya naye ne ngulekawo ne ntandika okulima obutiko.
Ebizigo ebikoleddwa mu butiko.
Natandika ne kapito wa 200,000/- mu 2010 kyokka mu kiseera kino nkungula kkiro ezisoba mu 200 olunaku nga buli emu agitunda 6,000/- kw’ossa okukola ebirimiro 30,000 buli lunaku nga buli kimu akitunda 3,000/-”, bw’agamba.
Agamba nti ng’oggyeeko okulima, waliwo emirimu mingi omuntu gy’asobola okukola mu kulima obutiko okutandikira ku kukola ebirimiro kuba bitandikira ku 3,000/- buli kimu okusinziira ku bunene n’ekitundu mw’oli, okukola ensigo nga zino akacupa katundibwa 3,000/- ku 6,000/- okusinziira ku bunene.
Wayini akolebwa mu butiko.
Ebirala ebisobola okukolebwa mu butiko kuliko; Ensaano, Kaawa, Ebizigo, Wayini, Sosegi y’obutiko n’ebirala. Agamba nti okutuukiriza bino byonna, betaaga kkiro z’obutiko ezisoba mu 10,000 buli lunaku nga kino kitegeeza nti bakyetaagira ddala abalimi abalala okubeegattako okusobola okutuukiriza obwetaavu buno.
Omwoleso gwa Harvest Money Expo, gutegekeddwa Vision Group ku kisaawe ky’ennyonyi e Kololo okutandika ku Lwokutaano nga March 18 okutuusa ku Ssande nga March 20 ng’okuyingira mu mwoleso osasula 10,000/- ate okuyingira emisomo nakwo osasula 10,000/- olunaku era nga guwagiddwa; ekitebe kya Budaaki mu Uganda, kkampuni ya Champrisa International, Engineering Solutions Ltd (ENGSOL), SR Afro Chicks and Breeders Ltd, Warehouse Receipting system ne Conversional Feeds.