Buuza omulimisa; Lwaki ebikolo by'emmwanyi zange bikala okumu ng'ate ennimiro egenda mu myaka 3?

Omulimisa wa Bukedde, nsaba kumpa ku magezi. Ennimiro yange ey'emmwanyi ya myaka esatu n'ekitundu naye egenda ekala ebikolo nga biva kumu kyokka bwe nkebera wansi ku nkolokolo y'emirandira nsanga wavunze. Ki ekiyinza okunnyamba okutaasa ebikolo ebisigadde obutakala?

Edward Mutaakome, omukugu ku by'emmwaanyi n’ekitongole ekitwala emmwanyi mu Uganda ekya Uganda Coffee Development Authority (UCDA), agamba nti: Oyinza okuba n'ebizibu bisatu mu nnimiro yo ebikutawaanya:

Ekisooka: Oyinza okuba n'enkuyege nga ze zirya emirandira. Ezo olina kugula ddagala lya nkuyege n'oteeka ku bikolo, n'okutta ebiswa ebiriraanyeewo.

Eby'okubiri: Kiyinza okuba ebiwuka ekika kya 'Twig borer'. Obwo kozesa eddagala ekika kya Immidaclopride 50gm mu liita z'amazzi 20, ogattemu ekika kya Tebuconazole 100ml mu liita 20 e'amazzi.

Ekizibu eky'okusatu: Kebera oba waliwo ebikonge by'emiti mu musiri gwo. Bino bibeeramu obuwuka obutawaanya emmwanyi ng'olina okubiggyamu n'osimawo akasalosalo akaawula ebikonge n'emiti gy'emmwaanyi emiramu obutakwatibwa nga buyita mu mirandira. Naye sooka okebere enkuyege.

Mu ngeri y’emu weetegereze olabe oba waliwo bumunyeera nga tebuvaawo, oyinza okuba n'ebiwuka obuyitibwa Milburgs. Buno gula eddagala nga dursban ow’obuwunga ajja kukuyamba.