Oruteerane rwa NAM rwayiguraho omuri Kampala.

N’ebya Umaru Kashaka

KAMPALA

Oruteerane rw’amahanga aga Non-Aligned Movement (NAM) orw’omurundi gwa 19 rwayiguraho omu butongore kandi Uganda etaayaayise oruteerane oru yashaba kuhagira ekyakorwa kumaraho ebizibu ebirikuteganisa amahanga aga.

Ebizibu ebirikuteganisa amahanga gatari gamwe harimu; eibura ry’eby’okurya, enshonga z’abafuruki, eibura ry’emirimo, okubarukaho kw’endwara, empinduka y’obwire, enshonga z’abahekyera n’ezindi.

Oruteerane oru orurikuza kumara ebiro 5 rwayigurwaho Minisita w’enshonga z’aheeru y’eihanga, Gen. (Rtd). Jeje Odongo ahari Munyonyo Commonwealth Resort Hotel. Oruteerane oru rwatandika eriizooba ebiro 15/01/2024.

Odongo nakyoreka ngu ekigombe ekya NAM, ekyatandikirweho omu mwaka gwa 1961.

Obwahati NAM erimu amahanga 120, amahanga 18 agarikurebuuza emirimo y’ekigombe eki hamwe n’ebitongore 10 ebirikurebuuza ekigombe ekya NAM.

Nabwo, Gen. Odongo yaagira ngu hakiriho ekizibu ky’eibura ry’esente kureetaho entunguuka hamwe n’endiijo nshonga y’eibanja.

Minisita yasiima abeebembezi b’eihanga erya Azerbaijan ahabw’omurimo murungi ogubakozire omu kutunguura emirimo y’ekigombe kya NAM kuruga batwara obwebembezi bw’ekigombe eki kuruga 2019 kuhisya 2022.

Nabwo yasiima Azerbaijan ahabw’okwikiriza kwebembera ekigombe eki ogundi mwaka gumwe.

Oru nirwo ruteerane orurikukirayo obuhango omu nsi yoona Uganda kutaayaayisa bwanyima y’okutaayaayisa orukiiko rwa Commonwealth Heads of Government omu mwaka gwa 2007.

Bwanyima y’oruteerane oru niheija kubaho oruteerane rw’amahanga G77+China orurikwija kutandika aharwamukaaga ebiro 19/01/2024 kandi nirwija kuhendera Orwakabiri aha mwanya nigwo gumwe.

Abagyenyi barikurenga 1,500 abarimu ba Purezidenti, enganzi z’amahanga ago, abarikwebembera ebitongore byaza gavumenti n’abandi baingi kuruga omu mahanga agakiriyo nigatunguuka nibo barikuteekateekwa kwetaba omu nteerane ezi 2.

#WestUpdates
#KaribuUganda