Pajero etomedde owa Vitz ku Entebbe Expressway n'afiirawo

Entambula eggulo yasannyaladde ku luguudo lwa Entebbe Express High Way, mmotoka ekika kya Pajero Sport nnamba UBF 787P bw'etomedde mmotoka ekika kya Vitz eri ku nnamba UAT 763W ebaddeemu omwami afiiriddewo ate omukyala gw'abaddemu naye ne baddusibwa mu ddwaliiro nga ataawa.

Abaserikale Nga Baggyayo Omulambo Gwa Kugonza

Kigambibwa nti akabenje kano kaavudde ku bakozi abaabadde balongoosa oluguudo luno nga baluggaddeko ekitundu, ddereeva wa Vitz olwatuuse mu kifo kino ekyabadde kisaliddwaako n'akendeeza ku sipiidi olwo owa Land Cruiser kwe kugitomera n'ewandagala mu bbanga.

Akabenje kano kagudde kinnya na mpindi ne Road toll y'e Busega nga waakava ku nkulungo y'e Busega, ng'afudde ye Kenneth Kugonza abadde omukozi mu kkampuni ya APM Terminals.

Abasirikale okwabadde ab'ebidduka kwossa n'abakuuma omukulembeze w'eggwanga baatuuse mu kifo awagudde akabenje kano, ne baggyewo onulambo ogubadde guwagamidde mu mmotoka.

Kenneth Kugonza Eyafiiridde Mu Kabenje

Abeerabiddeko n'agaabwe bagamba obuzibu bwavudde ku bakozi abalongoosa oluguudo be bagamba nti tebalabula baabidduka nga bagenda okuluziba, ng'ate ne ddereeva wa Pajero yabadde avuga ndiima.

Kitalo Ekya Kugonza

Baddereeva abakozesa oluguudo luno basabye abalongoosa oluguudo luno okubaako nobudde bwe bakoleramu kuba ebiseera eby'omu ttuntu abantu baba beeyuna ngendo zaabwe naddala abo aboolekera ku kisaawe ky'ennyonyi e Ntebe.

Mmotoka ekika kya Pajero Sport eyatomedde Vitz

Oluvannyuma kasiringi zaaleeteddwa ne zisikawo mmotoka zino, omulambo ne gutwalibwa mu ggwanika e Mulago okwekebejjebwa.