Masaba y'asikidde Isabirye mu BUL

Mu Stanbic Uganda Cup (Lwakubiri);

Wakiso Giants – Vipers SC, Wakisha

Soltilo Bright Stars – Kiyinda Boys, Kavumba

Lwakusatu (March 15, 2023)

Onduparaka – Bul FC, Arua

Express – Paidha Black Angels, Wankulukuku

BUL FC ekakasizza Simeon Masaba okudda mu bigere bya Alex Isabirye Musongola ng’omutendesi omujjuvu okutuusa nga sizoni eno eweddeko.

Isabirye, yasuddewo omulimu guno ku Lwomukaaga lwa wiiki ne yeegatta ku Vipers SC ku ndagaano ya myezi mukaaga ng’adda mu bigere bya Bianchi Beto eyakwatiddwa ku nkoona olw’omutindo ogw’ekibogwe.

Okusinziira ku Joseph Mutaka akulira ebyemirimu mu BUL FC, oluvannyuma lwa Isabirye okubaabulira mu kiseera we babadde basing okumwetaagira, basazeewo okumusikiza Masaba abadde omumyuka we.

“Isabirye yatukoze bubi kuba tubadde tukyamwetaaga. Mu kiseera kino tetusobola kuteekawo mbalirira ya mutendesi mupya, Masaba akyalina endagaano, yabeerako ku URA FC, Onduparaka mu liigi y’oku ntikko, tukkiriza nti ajja kutuwanirira nga bwe twetereeza,” Mutaka bwe yategeezezza.

Masaba waakumyukibwa Baker Kasule, James Magala, Daniel Kabale, Noah Kasule Babadi ne Patrick Asiku.

Ku Lwokusatu nga March 16, 2023, BUL FC yaakukyalira Onduparaka mu Stanbic Uganda Cup omutendera gwa ttiimu 16 nga mu kiseera kino ttiimu yatuuse dda mu disitulikiti y’omu Arua ku kisaawe kya Green Light Stadium gye bagenda okutendekerwa leero (Mmande) n’enkya (Lwakubiri).

“Bwe tumala okuzannya Onduparaka tugenda kusigalayo mu Arua nga bwe tulinda omupiira gwa StarTimes Uganda Premier League ne SC Villa ku Ssande,” Mutaka bwe yayongeddeko.