Omukazi omuri Mbale kukomwa emyaka 3 ahabw’okuguza emibazi y’amatungo y’ekicupuri

N’ebya Nagudi Fatumah 

Mbale:

Omuramuzi w’eidaara ry'okubanza omu disiturikiti ya Mbale atsindikire omukazi orikumanywa nka Eunice Lutiro, 35, omutuura wa Bitibwa omu disiturikiti ya Namisindwa omukihome kukomwa emyaka 3 bwanyima y’okusingisibwa omushango gw’okuguza emibazi y’amatungo y’ekicupuri.

Kooti egi ebeire eyebembiirwe omuramuzi Morris Oburu kandi eki kizireho bwanyima y’okushomerwa omushango ogu kandi gukamusinga.

Omuramuzi wa kooti y'eidaara ry'okubanza omuri Mbale, Morris Oburu...(Photo by Nagudi Fatumah)

Aha kushomerwa, Joseph Wasabula Massa, puriida wa Lutiro ashabire kooti okumukyendereza aha kifubiro ahabw’okugira ngu ayine obujunaanizibwa bw’okureeberera abaana n’abazaire be kandi n'omurundi gw'okubanza kukora omushango ogu.

Hoona omuramuzi Oburu tayikirize okushaba oku ahabw’okuba asiisire obwire bwa kooti arikwetorora ahamushango ogu. Hoona amuragiire kushashura miriyooni emwe.

Eunice Lutiro orikujunaanwa emishango egi...(Photo by Nagudi Fatumah)

Lutiro akakwatwa ab’ekitongore ekirikujunaanizibwa ahamutindo gw’eby’emibazi omu eihanga ekya National Drugs Authority ahabiro 21.10.2021 bwanyima y’okushangwa naguza emibazi y’amatungo y’ekicupuri omuri Mbale, Bugiri n’ahandi kandi atwiire aha ‘bail’.

Abiaz Rwamwiri, omugambirizi w’ekitongore ekya NDA naagira ngu ekifubiro eki nikiza kukora nk’eky’okureeberaho ahari abo abandi abarikukora bizinesi niyo emwe omubihenda biragiro.

Abiaz Rwamwiri, omugambirizi w’ekitongore ekya NDA...(Photo by Nagudi Fatumah)

Omukikwekweeto eki, bokisi 14 ezirimu emibazi nka dewormers, antibiotics, multivitamins, acaricides na antiparasitic zikakwatwa.

#WestUpdates