UNEB efulumizza ‘Time Table’ ey’ebigezo ebyakamalirizo ebya P7, S4 ne S6

Bya Wilson w. Ssemmanda

UNEB efulumizza ‘time table’ ey’ebigezo ebyakamalirizo ebya P7, S4 ne S6 ng’eraga nti abayizi 1,224,371 abeewandisizza okutuula PLE , UCE ne UACE mu masomero
20,921.

Akulira UNEB, Dan Odongo bwe yabadde afulumya ‘time table’ ez’ebibiina bino yayanjudde nti abayizi ba S4 be banaasooka okutandika ebigezo nga October 16 n’okubuulirira abayizi bamalirize nga November 17, 2023.

Abayizi ba S4 abagenda okutuula bali; 362,221 nga beeyongeddeko ebitundu 4.3 ku buli 100 okuva ku abo 349433 abaabituula mu mwaka 2022.

Ku bano kuliko abalenzi 180,357 n’abawala 184,064 nga ba kukolera mu bifo 3861.

Abayizi ba P7 ebigezo baakubitandika ku Mmande nga November 7, nga bababuulirira, ku Lwokubiri November 8, bakole okubala ne SST bamaliriza ku Lwokusatu
November 9 nga bakola Science ne English.

Bano okutwaliza awamu bali; 749,371 nga bakolera mu bifo 14,778. ku bano kuliko abawala 391,574 n’abalenzi 357,797.

Aba S6 batandika November 18, bamalirize nga December 9, 2023. Bano bawera 110,579 nga kuliko abalenzi 63,327 n’abawala 47,252 nga bakolera mu bifo 2,282.

Odongo yasinzidde mu lukung’aana lwa Bannamawulire ku Media Centre mu Kampala n’asaba bazadde n’abayizi okukebera enkalala z’abayizi azaatimbibwa ku masomero okuva nga August 14, 2023 okumanya oba ebibakawatako byawandiikibwa mu
butuufu.

Mu by’okwekenneenya mulimu: empandiika n’ensengeka y’amannya, obufaananyi, amasomo ge bakola (eri aba S4 ne S6).

Yagambye nti singa omuyizi abeera nga teyeeraba ku lukalala kyokka ng’alina obukakafu nti ddala kituufu yasasula ssente z’okwewandiisa mu budde bategeeze mangu UNEB.

Odong yategeezezza nti bakizudde ng’ekiviirako okusazaamu ebigezo by’abayizi, abasomesa babeera tebabateeseteese bulungi kubabuulira kye balina okukola n’agamba nti ssinga kizuulibwa nti omuyizi yakoppa ne bwe kiba ekigezo kimu ebibye byonna
bisazibwamu.

Mu kiseera kye kimu, UNEB yalangiridde nti nneetegefu okuteekateeka ebigezo
eby’akamalirizo ebya sirabaasi empya, abayizi abali mu S3 bwe banaaba batuuse mu S4, mu 2024.

Yagambye nti baatandise dda okugezesa ebigezo ebyo nga bwe binaalabika ku bayizi 6000 okuva mu masomero 220 ne babaggyako n’ebirowoozo ku nkola eno. Ku
ntandikwa ya 2024 ba kuweereza ebigezo bino eby’okwegezaamu eri amasomero ga Siniya gonna bategeere enkola empya nga bukyali.

Abayizi abagenda okutuula ebigezo bya UNEB mu P7, S4 ne S6 kuliko abawala 622,890 (51%) n’abalenzi 601,481 (49%); nga abaweererwa Gavumenti bali
645,191 (53%), n’abasomera kwa bwannannyini bali 579,180 (47%).