Sheikh Ndirangwa ayanukudde abamukolokota olw'okuva mu ofiisi e Kibuli

Supreme mufti eyawummula Sheikh Silimani Kasule Ndirangwa agambye nti abakyamukolokota olw’okulekulira ku kifo ekyo bamuveeko kubanga bweyali akyakirimu abamu baali batandise okumutunuulira nga ekizibu eri Obusiraamu kye yava asalawo akibalekere balabe bwe kyokya.

Sheikh Ndirangwa agambye nti ekimusanyusa gwe mukululo gweyaleka e Kibuli mu ofiisi ya Supreme Mufti kubanga ba Khaadi emmotoka empya ttuku ze bavuga yeyayogera ne pulezidenti Museveni n’awa abasiraamu emmotoka ezo.

Yabadde Nakifuma mu Mukono nga ali mu kulambula Baimaamu ne basheikh mu nteekateeka gy’atambuza ey’okusitula embeera mwe bawangaalira n’okusingira ddala okulongooza eby’enfuna yabwe.

Sheikh Ndirangwa agamba nti eky’okuva mu ofiisi eyo tekimulobera kuweereza Busiraamu kubanga omuntu asobola okuweereza mu buli kifo.

Agamba nti kati essira alitadde ku kulongoosa embeera z’abakulembeze n’abasomesa b’eddiini nga ayita mu kibiina ky’akulira ekya Imaams and Sheikhs Development Initiative Uganda.