Sheebah Karungi akubye akulira Vision Group akaama: Ssebo nkulinze ku Serena olabe bwe nyeenya ekiwato

Abadde ku pulogulaamu y’Olugambo ku Bukedde TV1 ng’annyonnyola abawagizi be enteekateeka z’ekivvulu kye ekituumiddwa ‘Sheebah Live in Kampala Serena Hotel Concert’.

Abadde yeesaze ka bbulawuzi akaddugavu akatangaala nga wansi atadde ekipale ky’amapeesa mu mabbali kyokka ng’agamu agatadde okulaga ku ntumbwe. Yo ffeesi ekyayaka ate bwagattako ka ffiga wamma ne nkulabira.

Oluvuddeyo ayiseeko mu ofiisi y’akulira kkampuni ya Vision Group efulumya ne Bukedde, Don Wanyama n’amukuba akaama. Amuyise okubeerawo mu kivvulu kino ng’akola ebyafaayo. Aba Bukedde be bamu ku  batadde ssente mu bbinu lino.

Ekivvulu kya Sheebah kino kya njawulo.  Ategese ebivvulu bibiri mu nnaku z’omuddiring’anwa bbiri mu kifo kye kimu ng’atunuulidde abo abaakolamu mpozzi n’abaagala ebirungi era kye kisoose mu nsiike y’okuyimba. 

Hajji Musa Kavuma owa KT Events ekivvulu kino y’akiri mu mitambo era yategeezezza nti okuyingira osasula 100,000/- aguze amangu tikiti, ku mulyango 150,000/-  ate emmeeza ya 3,000,000/- olwo ku Ssande nga December 11, 2022 bagende ku Freedom City e Najjanankumbi ku Ntebe Road.

Ekivvulu kino kigenda kubeerayo ku Lwokutaano nga December 9, 2022 ne ku Lwomukaaga nga December 10, 2022 oluvannyuma alumbe Freedom City ku Ntebe Road ku Ssande nga December 11, 2022 nayo abalageko.

Sheebah amaze emyaka nga mukaaga nga y’omu ku bayimbi abali ku ntikko mu kukuba omuziki mu Uganda nga kati kye kiseera ave mu kutwala abawagizi mu bisaawe  abatuuzeeko ku Serena nga batambulira ku kiwempe ekimyufu ng’eno bw’abakuba omuziki gwe balifa tebeerabidde.

Sheebah Karungi alina ennyimba nga: Nkwatako, Nakyuka, Empeta, Wankona, Nninda, Binkolera, Twesana, Nkwata bulungi, Onkutudde, Try my love, By the way, Boy Fire, Empiki n’endala nnyingi.