Provost wa lutikko y’e Mukono Rev Canon Godfrey Ssengendo atuuziddwa olwaleero mu butongole nga provost w’obulabirizi bw’e Mukono ow’omulundi ogw’okutaano ku mukolo oguyindidde ku kkanisa y’abatuukirirvu Andereya ne phillipo.

Omulabirizi w’obulabirizi buno obw’e Mukono Rt Rev Enos Kitto Kagodo y’akulembeddemu omukolo ogw’okumutuuza wakati mu mizira n’essanyu okuva eri abakristaayo n’ababikonge ab’enjawulo abagwetabyeeko.

Bw’abadde atuuza provost ono Ssengendo n’omukyala Rebecca Ssengendo, omulabirizi kagodo amukalaatidde okukulembeza amazima, obwenkanya n’obwerufu mu buweereza bwe nga n’ekisinga obukulu kwe kutambulira mu bigere bya ba ba provost ababaddewo asobole okubeebuuzangako wonna w’aba afunye okusoomoozebwa era nga bw’ati bw’amusibiridde entanda oluvanyuma lw’okumukwaasa obuvunaanyizibwa.

“mbakuutira okubeera abegendereza mu byonna ate mugondere eddoboozi lya katonda mubeere beesimbu era abavumu awatali kutya mu buweereza bwammwe,omukama abayise n’ekigendererwa era mubeere eddoboozi lye eri enkulaakulana y’ekkanisa eno.”Omulabirizi Kagodo ng’abakuutira.

Ye Rev Canon Godfrey Ssengendo asomedde abeetabye ku mukolo guno obweyamo bwe n’egimu ku mirimu egy’enkizo gy’agenda okutandikirako omuli okussaawo enkolagana ennungi wakati w’abakkiriza n’abaweererza ab’ekkanisa eno,okubuulira enjiri erwaanyisa obwavu n’emirimu.

“tugenda kulera bulungi ekisibo ekituweereddwa era tugenda kunyweeza ebibiina by’ekkanisa eno omuli Ekya Mothers ne Fathers Union n’ebirala, tugenda kusimba nnyo essira ku bulamu obw’omubiri n’obwomwooyo nga tukubiriza abantu okujjumbira enteekateeka zonna omuli okwejjanjaba,okwekebeza endwadde ez’enjawulo ate era n’okwegemesa.”Ssengendo bwe yagambye.

Akulembeddemu okubuulira ku mukolo guno ye provost w’ekkanisa ya Uganda mu bulabirizi bw’e Kampala Rev Canon Dr Rebecca Nyegenye asabye Ssengendo okutuunuliza obuweereza bwe eri katonda ng’omusomesa we omukulu n’obutatunuulira kusomozesbwa okumugya ku mulamwa.

Ono era asabye abakkiriza okussa Provost alondeddwa mu ssaala zaabwe okwewala okukulembeza amalala ng’akola emirimu gye n’okugikola ekifuula nnenge.