Omwawule abiisanyizza n'omusamize ku lusozi ne beeraga eryanyi

Bagasimbaganidde ku lusozi Ssala e Lwabenge mu Kalungu.

Omusamize agambye nti Ashirah Nalukwago eyava e Mbarara  nti atuulwako omusambwa Nakayima wamu n'ogwa Bujagaali.

Ven. Rev Christopher Wasswa ye Ssabaddinkoni w'obusabadinkoni bw'e Kabungo mu bulabirizi bwa West Buganda.

Rev Wasswa okugenda ku lusozi luno abadde ku mulimo gw'okupunta ettaka ly'ekkanisa okulyawukanya ku ky'Eklezia n'ery'olukale.

Ku ntikko y'olusozi gy'asing'anye Nalukwago mu lubiri lwe omuli obusiisira n'amayinja agayoyooteddwa ng'agamu agabisseeko obusuuka obweru ne gaataddeko obuleku n'amafumu.

Rev. Wasswa abadde ne ssentebe wa LCIII David Balemeezi Ssegawa n'abalala abatuuse mu mbuga nga babuuza nnyiniyo n'engeri gye yagiggyamu.

Nalukwago yeesowoddeyo n'ayanukula kajjogijjogi w'ebibuuzo mw'ategeerezza nti embuga ya Nakayima nti ate ya Bujagaali.

Rev. ataddemu ennyimba ng'eno bw'awerekereza ebigambo nti Yesu yajja okuwonya ababonyabonyezebwa Sitaani beefunire obulamu obutaggwawo.

Balagidde Nakayima ayingire abayitire Nakayima n'abagamba nti yatambuddemu ate bw'atudde munda ne yeesuulira ekikooyi nti wano afuuse Nakayima bamwanjulire ebizibu byabwe!

Rev Wasswa

Nalukwago ababuulidde enjiri ya Lubaale n'emisambwa ng'alumiriza Omwawule nti naye yeetaaga okubisamirira kuba ne Yesu bwe yava mu bwennyama yadda wa Gguluddene n'asisinkanayo bafu banne.

Omwawule Wasswa tamulinze kwongerako birala n'amulagira afukamire amusabireko essaala Yesu amuwonye obubuze bw'alimu adde mu kkubo ery'okutya Katonda.

Nalukwago akikoze n'omuvubuka ne basabirwa kyokka bw'agambiddwa akambulewo essabo n'alayira nti ekyo takiyinza ng'abeera yeegaanye bazadde be.

Rev Wasswa ng'asabira omusamize Nalukwago

Nalukwago agambye nti essaala agikkiriza kuba naye akkiriza Katonda ow'omu Bwakatonda.

Omwawule Wasswa akkaatiriza nti ogugwe gubadde gwa ku musabira ng'era akkiriza nti essaala tezijja kumuleka kye kimu.

Wano Nalukwago asuddemu oluyimba lwa Zziizi awunnya ng'awunyira mu njuye...ng'eno bw'atyabula amazina.

Bamubuseeko bukumbu ne beeyongerayo ku gw'abatutte. Nga tukulabira katemba atali musasulire!!!