Olukiiko lw’ebyenkulaakulana luyiise olwa ssentebe obutalabikako

OLUKIIKO olw’ebyenkulaakulana olwategekeddwa e Ddimu ku mwalo mu Masaka lugudde butaka oluvannyuma lwa ssentebe w’ekyalo obutalabikako. Kyaddiridde ssentebe ono, Gerald Kyakulumbye n’abamu ku bakulembeze ku kakiiko ke okwekobaana ne bagaana abatuuze okujja mu lukiiko luno, olwayitiddwa ssentebe w’eggombolola y’e Kyesimbu, Michael Kabuye, olw’enjawukana zaabwe mu by’obufuzi, naye n’atalabikako kyokka nga ye yabadde atambuzibwako ensonga.
Kigambibwa nti Ssentebe Kyakulumbye yeekobaana ne bakulembeze banne ne bakunga abantu obutagenda mu lukiiko luno olwategekebwa okusomesa abantu bwe banaaganyulwa mu wooteeri galikwoleka ssaako bbiici ebigenda okuteekebwa ku mwalo guno era abatuuze batono abaalwetabyeko. Kigambibwa nti ssentebe w’ekyalo yakkaanya ne bakulembeze banne ne bakola endagaano ku mwalo gwe Ddimu bazimbeko wooteeri ne bbiici, nti kyokka ne bamuyita emabega bwe baali bakuba ekyapa n’okuteekawo olukomera ku wooteeri w’erina okusaliza ne batamuyita, nga wano we waava emberebezi. Amyuka RDC w’e Masaka, Robert Kambugu Ssenyonga yategeezezza nga bwe bagenda okuddamu okuyita olukiiko olulala. Wabula abatuuze ababeera ku mwalo gw’e Ddimu mu Ggombolola y’e Kyesiiga mu Town Council
ya Kaliisizo mu disitulilikiti y’e Masaka beetemyemu ku by’okuleeta enkulaakulana eno abamu ne balaga okutya nti boolekedde okusendebwa ku ttaka, kyokka abalala bagamba
nti kino kigenda kukulaakulanya ekitundu. Ekitundu ekimu ku ttaka lino kyamaze dda okukubwako olukomera nga kigambibwa akulira Operation Wealth Creation, Gen. Elly
Kayanja alina enteekateeka okuzimba wooteeri galikwoleka ne bbiici
ku kitundu ku ttaka eriweza yiika 78 okuli n’abantu abasoba mu 5,000.