Okusaala Eid e Bwaise ; Abakyala basabiddwa okuwulirwa babbaabwe

SHEIKH Yasir Kulumba avunaanyizibwa ku by’eddiini mu ofiisi ya Supreme Mufti wa Uganda asabye abakyala bulijjo okubeeranga abeetowaze era abawulize eri abaami baabwe.

Abasiraamu Nga Bakulemberwa Sheikh Yasir Kulumba (owookuna Okuva Ku Ddyo),akulira Ensonga Z'eddiini Mu Ofiisi Ya Supreme Mufti E Kibuli Era Imaamu W'omuzikiti Guno. Nga Basala Embuzi.

Sheikh Kulumba nga ye Imaamu w’omuzikiti gwa Faraaji ogusangibwa mu Bp Mukwaya Zooni mu Bwaise I e Kawempe agamba nti kino kyakuyamba okunyweza amaka n’obufumbo okutwalira nga bakola ebyo ebibeera bibagambiddwa babbaabwe.

Awadde eky’okulabirako ky’Omukyala Hajarah, bba Ibrahim bwe yamuggya e Palestine n’amutwala e Mecca awataali kumulekera kintu kyonna eky’okukozesa wadde enju.

Abasiraamu Abeetabye Mu Kusaala Eid Adha.

“Omukazi bwe yabuuza bba lwaki amuleese mu mbeera eno, Ibrahim n’amugamba nti Katonda y’amulagidde, n’agumira embeera.  N’olwekyo abakyala mbasaba babeere nga bayamba basajja baabwe,babaagalize ebirungi mu kifo ky’okubalemesa,okubaloga n’ebirala,” Sheikh Kulumba bw’asabye.

Mu kikolwa kino, Katonda yali ateekateeka Ibrahim mu kikolwa ky’okusaddaaka, akabonero akavaamu ekikolwa ky’okusala ebisolo okujaguzibwa Idd mu kiseera kino.

Sheikh Kulumba asabye abategeka okulonda mu ggwanga okulaba nga kubeera kwa bukakkamu, temuli miggo wadde okusika omuguwa nga bwe byeyolekera mu kulonda kwa Kawempe North.

“Abantu bwe baweebwa omukisa okwerondera abakulembeze,basaanye okulekerwa ebeetu beesalirewo kubanga bwebalonda abalungi,yebeera enkulakulana y’ekitundu kyaabwe,” Sheikh Kulumba bwagambye.

Asabye abasiraamu okukozesa olunaku luno okutabagana ne bannaabwe,okuyamba abalina obwetaavu ate n’okunywerera ku mutonzi waabwe.

Oluvannyuma basaze ebisolo okuli ente n’embuzi, ng’akabonero k’okutuukiriza olunaku luno.