Ogwaggulwa ku Paasita Ssenyonga n’abakuumi be guweereddwa omulamuzi omulala

Ffayiro y’omusango gw’Oomusumba Jackson Ssenyonga ogwamuggulibwako omu ku baali abagoberezi be eyakubibwa abakuumi be ne bamubba ne bamutuusaako n’obuvune eweereddwa omulamuzi omulala.

Omusango guno gubadde mu maaso g’omulamuzi wa Bonifance Wamala owa Kkooti enkulu ewozesa emisango gy’engassi wabula ono yasazeewo okugivaamu n’eweebwa omulamuzi omulala, Dr. Douglas Singiza.

Omusango gwabadde gulina okusomebwa mu maaso g’omulamuzi Singiza ku Mmande kyokka tekyasobose olw’omulamuzi obutabeerawo, ne gwongezebwayo okutuusa nga July 1, 2024.

Sam Mukula eyali asabira ku kkanisa ya Ssenyonga eya Christian Life Church e Makerere- Kavule ye yamuwawaabira wamu n’abakuumi be okuli Israel Wasswa, Ali Ojulongo

Peter, Godfrey Mwanda ne Ivan Wanyama eyali asiikirawo chappati nga bano baasingibwa omusango gw’okubbisa eryanyi eri Mukula era ng’abamu bakola ekibonerezo kyabwe mu kkomera e Luzira.

Mukula ng’asinziira ku nsala y’omulamuzi Isaac Muwata yaddukira mu kkooti eno ng’ayagala bamuliyirire olw’obuvune bwe yatuusibwako nga June 8, 2018 ku kkanisa ya Christian Life Church e Kavule, Kawempe.