Minisitule y'ebyenjigiriza etongozza enteekateeka y'okusomesa abanoonyi b'obubudamu

Bya Sharon Nabasirye 

GAVUMENTI etongozza enteekateeka ey'okuyamba abanoonyi b'obubudamu mu  Uganda.

Enteekateeka eno yaakuwemmenta ensimbi eziwerera ddala obukadde bwa doola 450 .

Bino byogeddwa minisita w'ebyenjigiriza, Janet Kataha Museveni  bw’abadde atongoza enteekateeka y'ebyensoma by’ababundabunda eyookubiri  mu maka g'obwapulezidenti e Nakasero. 

Mu nteekateeka eyasooka , minisita Janet Museveni ategeezezza nti baagenderera okussaawo embeera esobozesa  buli muntu mu nkambi zino  okufuna ebyenjigiriza eby'omulembe,  okutereeza embeera ey'okufunamu obuyambi bw’ababundabunda  wabula ng’ enteekateeka eno eyookubiri egendereddwaamu okuyamba abantu 674,895 okuganyulwamu buli mwaka.

Enteekateeka etongozeddwa yaakutandika mwaka 2024/2025 , era obukadde  450 obwa doola bwe bussiddwaawo okuyamba abanoonyi b'obubudamu mu disitulikiti z'eggwanga ez'enjawulo, bonna okusobola okufuna eby'enjigiriza ebiri ku mutindo ku madaala gonna ag'ebyenjigiriza. 

Dayirekita wa UNICEF mu Uganda,  Dr. Munir Safieldin  yeebazizza minisita w'ebyenjigiriza olw'okukola obutaweera okulaba ng’ abanoonyi b'obubudamu bafuna ebyenjigiriza eby'omulembe kubanga ky’ekyobugagga ekisinga kyawadde abazadde b’abaana bano abawangaalira mu nkambi  .

Ye omumyuka wakiikirira UNHCR Jason Hepps  ategeezezza nti  bakyalina obwennyamivu ku muwendo gw'abaana abasoma siniya n'amasomo g'eby'emikono  okuba wansi  ddala nga kino kyetaaga kunogera ddagala nga bukyali .