Minisita abalabuddeku kudibaga enkola ya Parish Development Model
MINISITA w’ebyamagana, Lt. Col. Bright Rwamirama alabudde okufaafaagana n’abanaadibaga enkola ya Parish Development Model n’agamba nti baakusibira mu kkomera.
Minisita abalabuddeku kudibaga enkola ya Parish Development Model
By Bukedde Omusunsuzi
Journalists @NewVision
Yabadde ali n’ababaka ba Palamenti okuva mu Disitulikiti y’e Isingiro okwabadde Ham Arinitwe owa Isingiro South, Nathan Byanyima owa Bukanga North, Stephen Kangwagye owa Bukanga County n’omubaka omukazi, Clare Mugumya nga bamaliriza okusomesa enkola ya Parish Development Model (PDM) ne basuubiza okukola kyonna okulaba ng’etuukiriza ekigendererwa ekigiteekesezzaawo eky’okukulaakulanya abantu ku buli muluka.
Minisita yagambye nti bakizudde nga waliwo abagoba bannaabwe mu pulogulaamu za Gavumenti ne bazijjuza abooluganda n’emikwano. Nga bali ku ggombolola y’e Birere mu Kaberebere, abamu ku bakulembeze okuli ne bakkansala b’amagombolola baaloopedde minisita n’ababaka nti beeraliikiridde nti entegeka za PDM zandibeera nga bwe gwali ku ssente z’Entandikwa, NAADS, Emyooga abamu bwe baatuuka n’okweyita kye batali ng’osanga SACCO nga ya bavubi kyokka nga tebalina na nnyanja mwe bavuba.
Wano minisita Rwamirama we yalabulidde nti abanaakwatibwa nga badibaga enkola ya Parish Development Model baakusibira mu makomera.
Yalabudde n’abakulembeze abasuubira okuleeta obuvuyo balye ssente za Parish Development Model okulekulira amangu ebifo byabwe.
Ab’e Isingiro baaloopedde minisita nti n’akakiiko akagaba emirimu ku disitulikiti kaava ku ky’ebisaanyizo nga kati emirimu giweebwa abawaddeyo enguzi.
Omubaka omukazi, Clare Mugumya yagambye nti ensonga y’enguzi bagenda kugirondoola okulaba ng’emalibwawo.
Minisita yasuubizza nga bwe bagenda okutuula n’abakulermbeze ba Disitulikiti y’e Isingiro okulaba nga batuukiriza ebibasuubirwamu.