Looya n'owa bbanka bagguddwako gwa kwekobaana kubba ttaka lya mufu

MUNNAMATEEKA Ronald Ceaser Munyanyi 52, n'omukozi wa  bbanka David Arthur Bagambe 47  basimbiddwa mu kkooti ku by’okwekobaana ne babba ettaka.

Bagambe nga mutuuze w'e Ntinda Kimera mu diviIzoni y'e Nakawa mu disitulikiti y'e Kampala ne Munnamateeka Manyanyi ng’akolera ku kizimbe kya Kizito Tower be baasimbiddwa mu maaso g'omulamuzi Ronald Kayizzi abasomedde emisango gye beegaanye.

Munnamateeka Munyanyi Ku Kkooti Ne Bagambe Nga Basomerwa Emisango

Bano bagguddwako emisango ebiri okuli ogw’okwekobaana okubba ettaka eriwezaako yiika 2 nga lyali lya mugenzi Charles William Makumbi erisangibwa e Busiro bbulooka 459 e Nalumunye Katale mu disitulikiti y’e Wakiso.

Kigambibwa nti ababiri mu mwezi gwa August 30 ,2024 ku Luwum Street mu Kampala, baagezaako  okwezza ettaka ly'omugenzi Charles William Makumbi  Ddumba erisangibwa e Nalumunye Katale mu disitulikiti y’e Wakiso n'okugezaako okwekobaana okuzza omusango nga tebafunye lukusa okuva mu baddukanya ettaka eryo.

Emisango gyonna baagyegaanye ne basaba kkooti okweyimirirwa nga bayita mu bannamateeka baabwe.

Wabula, omuwaabi wa gavumenti, Ivan Kyazze asabye kkooti obutakkiriza kusaba kwa bano kuba okunoonyereza ku musango kukyagenda mu maaso era nga basobola okutaataaganya okunoonyereza.

Omulamuzi akkirizza okusaba kwabwe era n'abayimbula ku kakalu ka kkooti ka bukadde 30 n'abaabeeyimiridde nabo obukadde 30 ezitali za buliwo.

Balagiddwa okuleeta paasipooti zaabwe eri kkooti nga kw’otadde  n'obutafuluma bweru wa ggwanga nga tebafunye lukusa okuva mu kkooti.

Omusango gwongezeddwayo okutuusa nga okutuusa nga January 8, 2025 okumanya okunoonyereza we kunaaba kutuuse.