Kayiira owa Bukedde TV aweereddwa engule olwa pulogulaamu ya Fayiro Ku Mmeeza

EKITEBE kya America mu Uganda kiwadde maneja wa Bukedde TV Richard Kayiira engule nga Munnamawulire eyasomerako mu America, asinze okukola emirimu egy’ettendo mu kisaawe ky’amawulire.

Engule zino zaagabiddwa eri abantu 13 abaasinze bannaabwe mu mirimu gye bakoze oluvannyuma lw’okusomerako mu America okuyita mu nteekateeka ez’enjawulo America zeeteekawo okuwa Bannayuganda amagezi olw’enkolagana Uganda gy’erina ne America.

Tony Kujawa omwogezi w'ekitebe kya Uganda mu America (ku ddyo) ng'akwasa Richard Kayiira engule gye yawangudde nga Munnamawulire eyasinze banne abaasomerako mu America.

Omukolo gwabadde ku woteeri ya Sheraton mu Kampala ku Lwomukaaga nga January 21, 2023, nga gwetabiddwaako omubaka wa America mu Uganda Natalie Brown.

Okuwa Kayiira engule, kyavudde ku ku mirimu gy’akola mu pulogulaamu ‘Fayiro Ku Mmeeza’ erafuubana okulaba ng’abantu abanyigirizibwa bafuna obwenkanya.

Pulogulaamu eno ebeerawo buli lwa Mmande okuva ssaawa bbiri ez’ekiro, okutuusa ku ssaawa ssattu ku Bukedde TV 1, n’eddibwamu ku Ssande ssaawa ttaano okutuusa ku mukaaga ez’ekiro.

Abaawangudde engule nga bali n'omubaka wa America mu Uganda Natalie Brown. Ow'okusatu okuva ku ddyo ye Richard Kayiira maneja wa Bukedde TV.

Oluvannyuma lw’okuweebwa engule eno, Kayiira agambye nti obuyigirize bwe yafuna mu America mu 2014, mu kukola amawulire ag’okunonyereza, bwe bwamusobozesa okutandika Pulogulaamu ‘Fayiro ku Mmeeza’ ng’ayambibwako bakamaabe mu Vision Group, nga Pulogulaamu eno agamba nti esobodde okugatta ettofaali ku nfuga egoberera amateeka, eddembe ly’obuntu, n’okulwanyisa ebikolwa ebinyigiriza abantu.

Ye Omubaka wa America mu Uganda, Natalie Brown agambye nti nga Uganda ne America zijaguza olw’okuweza emyaka 60 nga zikolagana, yeenyumiriza mu nkyukyuka ezikoleddwa Bannayuganda abasomeddeko mu America nga bayita mu nteekateeka ez’enjawulo ezaateekebwawo Gavumenti ya America.

Tony Kujawa omwogezi w'ekitebe kya Uganda mu America (ku ddyo) ng'akwasa Richard Kayiira engule gye yawangudde nga Munnamawulire eyasinze banne abaasomerako mu America.

Mu balala abaawangudde kwabaddeko; Margaret Sekaggya omulwanirizi w’eddembe ly’obuntu, Florence Nightingale Kuteesa akoze ennyo mu kusitula abakazi n’abaana abawala, Ronald Hakiza akoze eby’amaanyi mu kisaawe ky’ebyentambula, Dr. Nakimuli Etheldreda Mpungu omusawo w’emitwe, Yinginiya Bainomugisha akoze eby’amaanyi kisaawe kya tekinologiya ow’empuliziganya, Razak Omia akyusizza eby’obulimi mu West Nile ng’ayita mu kutuusa ebikozesebwa mu kulima eby’omutindo eri abantu, Fred Mutebi atumbudde olubugo n’ebiyiiye bya Uganda mu nsi yonna ne Victo Nalule alwanirira abantu abaliko obulemu.

Abalala kuliko; Elizabeth Rwabu Munnabyanjigiriza, Mercy Musingo omukulembeze era alwanirira abakyala, Moses Obbi omukulembeze ow’enjawulo mu banne abaasomerako mu America, ne Raymond Musiima agasse Bannayuganda n’amatendekero ag’amaanyi mu America.