Essomero litabuse n'Abalokole lwa Bidongo

Wabaluseewo obutakkaanya wakati w’abaddukanya essomero lya Rayan education Centre Namanve n’abalokole ab’ekkansiza ya Pentecostal Church ku kyalo Nantabuulirwa mu ggombolola y’e Goma mu disitulikiti y’e Mukono, ng’abasiraamu abaddukanya essomero lino, balumiriza abalokole okuleekaanya ebidongo ne biremesa abayizi okusoma obulungi.

Mu lukiiko olutudde ku muzikiti gwa Masjid Jamia, olubaddemu abatuuze n’abasiraamu, Imaam w’omuzikiti guno Sheikh Ibrahim Busuulwa ategeezezza nga bwe bamaze ebbanga erisoba mu myaka ebiri nga bagugulana n’abalokole bano era nga ne gye buvuddeko beekubira enduulu eri RDC w’e Mukono Fatumah Ndisaba kyokka ne batafuna buyambi bwonna.

Abamu ku bayizi

Busuulwa aloopedde abakulembeze ng’abekanisa bwe bassaako ebidongo emisana ttuku ng’abaana basoma ekibagya ku mulamwa olwo bonna ebirowoozo ne babigya ku bibasomesebwa ne babissa ku ndongo nga n’ekikyasinga  okubeeraliikiriza ze nnaku embale ab’ekibiina eky’omusanvu ze babulayo okukola ebibuuzo byaabwe eby’akamalirizo.

Ddayirekita w’essomero lino Andrew Galandi ategeezeza ng’abalokole bwe baabasaba obukadde 120 okuvaiira nga kuno kwe baagatta n’okuzimba kaabuyonjo okuliraana effumbiro ewafumbirwa emmere y’abayizi n’asaba abakulembeze okulaba ng’ensonga eno ku mulundi guno ekolebwaako basobole okuyambibwa okwewala abaana okukwatibwa endwadde eziva ku buchaafu.

Paasita atwala ekkansia eno Jacob Mangeni ku lukomo lw’essimu, asambazze eby’okusaako ebidongo mu kiseera ng’abaana basoma kyokka naye n’alumiriza ab’essomero lino abaludde nga bakola ebintu eby’enjawulo mu ngeri ey’okumusoomooza abaviire nga baddira kazambi n’akulukutira mu kifo kye nga kwe bagasse n’okuddira obuchupa obulimu omusulo ne babukasuka mu kkanisa ye.

Direkita w'essomero ng'aliko by'annyonnyola

Ono anyonyodde nga ye bw’ataabalagirako okumuwa ensimbi ezo obukadde 120 wabula nga bakaanya ab’essomero okumugulira ekifo ekirala bakimukwaase mu butongole ye abaviire, ekintu ekyabalema.

Omubaka betty Nambooze bakireke ategeezezza ng’ekikolwa ky’abalokole bwe kikontana n’agamu ku mateeka agassibwaawo munisipaali naddala eteeka ery’ebireekaana era ng’ amangu ddala baakuyitibwa mu ofiisi ye babitebye n’abawa n’ensimbi akakadde kamu ze basonda okugula ekifo ewalala.

Meeya erisa Mukasa Nkoyoyo ye alagidde abalokole okulekera awo okuteekako ebidongo mu kiseera ng’abaana basoma era n’abawa ennaku musanvu zokka nga beeyanjudde eri ku munisipaali ng abwe banalemererwa ebidogo byaabwe bya kuwambibwa