ABASUUBUZI mu katale k’e Gaba n’okutuusa kati bakyakukkuluma olwa kye bayita okubasibako obukulembeze. Balumiriza nti abakulembeze bano bakwata bubi ssente ze babakuhhaanyamu.
Embeera eno eddiridde obukulembeze bwa Sabiiti Katuramu n’akakiiko ke ak’abantu omukaaga okuggwaako mu 2022, abasuubuzi ne beetegekera okulonda obukulembeze obupya kyokka Sabiiti ne banne ne balemerako ekyawaliriza minisita wa Kampala Hajati Minsa Kabanda n’akakiiko ka State House akalwanyisa enguzi okubiyingiramu mu 2023.
Minisita Kabanda yawandiika ebbaluwa ng’alagira obukulembeze bwa Sabiiti okudda ebbali wabeewo okulonda era RCC Mark Baingana n’alagira Town Clerk w’e Makindye okutegeka okulonda kyokka n’okutuusa kati tewali kyali kikoleddwa ekireetedde abasuubuzi okwetamwa.
Jimmy Kamya, omusuubuzi ate nga mukulembeze mu katale kano yategeezezza nti ebiriwo kati nabo byabasobera. Baategeezebwa emyezi mukaaga emabega nga bwe bagenda okuddamu okulonda abakulembeze wabula ne kitakolebwa.
Baddamu ne bategeezebwa nti akakiiko akakulemberwa Town Clerk w’e Makindye kaakutegeka okulonda mu April nagwo ogwaweddeko.
Bino nga tebinnabaawo, akakiiko ka ‘State House Anti Corruption Unit’ bwe baali kakola okunoonyereza kwako ku mivuyo, kyakkaanyizibwa nti obukulembeze obuliko bugira buweereza okutuusa mu April naye teri kivaayo. Abasuubuzi era baasabibwa okuddamu okwewandiisa kati beebuuza ekiddako.
Kyokka Sabiiti yagambye nti eby’okuwandiisa abasuubuzi tebinnaba kutandika.
Yagasseeko nti emirimu bo ng’abakulembeze abakyaliko bagikola bulungi wabula bannakigwanyizi abatayagala bukulembeze buliko ate be babwogerera ebikankana okulaba nga balemesa emirimu egikolebwa