MUKYALA wa Jose Chameleone, Daniella Atim atandise omukutu gwa ‘Youtube’ kw’agenda okuyita annyonnyole buli kimu ekyamutuukako mu bufumbo bw’agamba nti yabumalamu emyaka 16.
Omukutu guno agutuumye ‘Diary Of A Retired Wife’ ky’oyinza okuvvuunula nti ‘Ebyama by’omukyala eyannyuka obufumbo’. Mu kwanjula omukutu guno, Daniella yategeezezza nti y’essaawa abantu naddala abakyala bayigire kw’ebyo by’ayiseemu.
“Eby’obuwanga ebisinga bikugira abakyala okwogera ku baami baabwe era nze omukutu guno hhenda okugukozesa okumenyawo ebyo,’’ bwe yategeezezza.
Yagasseeko nti mukakafu abakyala bangi abali eyo abalinga ye (tebalina bwogerero) era nga ke kaseera bafune omuntu abayiirawo omubiri.
Yasuubizza okwogera ku buli kimu ekyali mu bufumbo bwe era Chameleone yamufunidde n’erinnya eppaatiike (Roomie) ekitegeeza omuntu gw’obeera naye, nga ly’agenda okumuyita mu emboozi ze ku mukutu guno.
Nga tannagenda mu America, kati gy’amaze emyaka 5, Daniella yali mukyala omukkakkamu atavaamu wadde ekigambo. Obubaka abantu bwe bamuweereza ku mukutu guno bulaga nga bwe babadde tebamusuubira okukola ekintu nga kino.
Omukutu gwe gwafunye dda abalabi abakunukkiriza mu 5,000 mu nnaku entono ze yaakagutandika.
Omukutu guno agutandise waakayita ennaku entono ng’avuddeyo n’ategeeza nga bwe yali akooye okutuntuzibwa, ettamiiro n’ejjoogo eryamutuusibwako ng’ali mu bufumbo.
Amawulire ga Daniella okuggulawo omukutu guno, Chamilli gaamusanze mu bbaala emu ku Lwomukaaga ku kabaga ke ak’amazaalibwa akaa mutegekeddwa mukwano gye.
BASSEREEBU BAMUWAGIDDEl

Zuena mukyala w’omuyimbi Bebe Cool y’omu ku bazze nga balaga obuwagizi eri Daniella naddala ku mutimbagano. Ono ne ku mulundi guno yasanyukidde ekikolwa kino era n’alaga nga bw’ali emabega wa Daniella.l Linda Lisah mukyala wa Douglas Lwanga, kw’ossa Flavia Oketcho omukubi w’ensero nabo baamukooneddemu ku kkubo lino eppya ly’akutte.l Priscilla Namayanja munnamawulire yagambye nti, Daniella talina kuzikiza era nga bbo abakyala bali mabega we