Bukedde egabudde ebyassava bya Idd abawanguzi ne babula okufa essanyu

ISMAIL Kato Matovu omufumbi wa piraawo mu Lubigi e Namungoona ye nnamukisa eyawangudde ekyapa kya Bukedde eky’ekisiibo n’awona embeera y’omuzigo.

Ate Sadik Ssekamwa 23, omusiizi w’ebifaananyi e Nabweru ye yeewangulidde pikipiki ya Tuk-Tuk gy’agambye nti y’entandikwa y’obugagga bulijjo bw’asaba Allah.

Eyawangudde Umrah Kata Afe Essanyu.

Mu ngeri y’emu, Ali Matovu Katabula ow’e Nakitokolo-Namagoma ne Joweria Kyawulire ow’e Jinja be beewangulidde olugendo okugenda e Mecca ne Madina ku Umra olwasasuliddwa kkampuni ya Chapa General Enterprises.

Abawanguzi bano bonna abaayise mu kalulu ka ‘Wangula Ettu lya Idd’ akamaze omwezi omulamba ku mikutu gya Bukedde okuli; Bukedde Fa Ma ne Bukedde Ttivvi. Abawanguzi awamu baabadde 60 okuli abaayise ku ttivvi 30 ne leediyo abawanguzi 30.

Abakyala Bazzeeyo Beetisse Amatu

Ng’oggyeeko abaawangudde ebirabo ebinene, buli muwanguzi yaweereddwa ettu omwabadde; siyaagi wa Prestige, ssabbuuni wa Jama, ssabbuuni wa Lanzo, omuzigo gwa Tilly, butto, ebibiriiti n’ebirala bingi okuva mu ba Chappa General Enterprises.

Super Supreme Mufti Sheikh Muhammad Galabuzi ye yabadde omugenyi omukulu era yeebazizza Vision Group n’agikulira Don Wanyama olw’okutegeka emikolo nga gino egisitula abantu bonna n’okuteekawo emikutulu gy’amawulire egizimbye eggwanga.

Ssenyonga Owa Bh Clarrah Ng'aliko Omu Ku Bawanguzi Gw'akubira Essimu

Abasiraamu mu ggwanga yabakuutidde okusigala nga bawulize nga beewalira ddala ebikolwa ebikyamu bye baasuula nga batandika ekisiibo n’okulinda ekitebe ky’Obusiraamu e Kibuli okubategeeza olwa Idd omwezi bwe gunaaba gulabise.

Akulira Vision Group, Don Wanyama yasiimye Supreme Mufti olw’omukwano gw’alina eri kkampuni n’ategeeza nti omulamwa gw’Obusiraamu ogw’okuteeka empisa n’obugunjufu mu bantu nabo kwe bayimiridde.

Wanyama yeebazizza kkampuni ezaatadde ssente mu nteekateeka eno omuli aba Chapa General Enterprises abakola Prestige Margarine, aba B- Clara H Property Sevices Ltd abatunda ttaka, aba Newman Foods abakola obumpwakimpwaki ssaako aba KAINIU abatuusa pikipiki omuli n’eza Tuk Tuk mu Ndeeba okuva e Korea nti be bayimirizzaawo enteekateeka eno.

Khalifah Ahmad Mukasa ne gguluupu ye eya Nateete Mataali Group be baasanyusizza abawanguzi ku mukolo ogwabadde ku kitebe kya Vision Group eggulo ku Lwokutaano.