OMUKAZI akubyewo abaana basatu omulundi gumu mu ddwaaliro e Kawempe. Bba olufunye amawulire n’asalawo adduke ng’agamba talina kyakuliisa mukazi n’abaana abasatu kubanga akyeyiiya bweyiiya.
Jimmy Sseremba, omutuuze w’omu Ndeeba era nga gy’atundira cakalacakala yabadde asazeewo alinnye bbaasi ave ku kibuga afune we yeewogoma ng’alese nnakawere mu ddwaaliro yeerabirire.
Kyokka abasuubuzi b’omu Ndeeba nga bakuliddwa Godfrey Muhiirwa owa Yamaha Center mu Ndeeba, baamutaayizza ng’agenda okulinnya bbaasi ne bamukomyawo. Baamubuuliridde n’okumugumya akkirize obuvunaanyizibwa bwe.
Baayise akola ku nsonga z’amaka n’abaana ku poliisi e Katwe, ASP Sarah Nanyunja naye n’atuuza Sseremba n’amugamba nti, ky’abadde akoze okudduka obuvunaanyizibwa musango era kisibya.
Sseremba ng’afukamidde ku maviivi, yeetonze n’ategeeza nti okudduka ssi lwakuba nti tayagala baana na mukyala we, wabula yatidde obuvunaanyizibwa. Yagambye nti omukyala yazaalidde mu ddwaaliro e Kawempe ku Lwokubiri lwa wiiki ewedde, ne bamuggya mu lukale ne bamuteeka we balina okusasulira (private), nti kyokka okuva olwo yabadde yaakakozesa obukadde 2 n’omusobyo n’alaba nga kimuyinze.
Ekirala ekyamutiisizza, ng’abaana baabasoosezza mu ‘nassale’ gye babalabiririra.
Abasuubuzi b’omu Ndeeba nga bakulembeddwaamu Muhiirwa n’ab’ekibiina kya Ndeeba Motors beesonzeemu ssente ne bazikwasa Sseremba atandikire okwo. Sseremba asabye abazirakisa okumudduukirira n’ensimbi nga baziyisa ku ssimu nnamba; 0757591628 oba 0785088879.
Asabye ne Katikkiro wa Uganda Robinah Nabbanja gattako Sipiika Anita Among okumudduukirira