ABASUUBUZI balaajanidde abakulira obutale  ku bavubuka abamenyi b’amateeka abanyagulula  abantu ekiviriddeko abaguzi okutandika okutya  okuyingira mu butale .

Kino kiddiridde abaguzi abawerako okwekubira enduulu mu batwala obutale nga abavubuka ababeera  mu maaso g’obutale  nga beefuula abasuubuzi nga batunda obuntu obutonotono n’ekigendererwa ky’okubba   abantu ng’abakulira obutale  tebakoze buvunanyizibwa bwabwe  .

Kaleerwe alina obutale obusoba 13 bwonna bwa bwannanyini okuli Freedom , Ssemiguwa , Bivamuntuuyo, Kyonoonya, Mpuuga , Kajjubi n’obulala nga buno bwonna bulina obukulembeze obwenjawulo  ng’abasuubuzi bagamba singa abakulembeze tebavaayo ku bakwata abavubuka bantu bagenda ku bagobako abaguzi

Moureen Namulindwa ng’ono baamubbako ensawo ye gye buvuddeko yategeezezza nti yali agenze mu kugula ebintu mmotoka nagireka ng’asibye bulungi yagenda okudda nga bagimenye babbyemu laptop ne 200,000/ . Yagasseko nti abavubuka bano ekiro bebamu abamenya amayumba g’abantu n’okuteega abatambuze ne babanyagulula

 Sulaiman kigongo akulira olukiiko lwa Trade Order olutwala abasuubuzi ne bannanyini butale ku kaleerwe yategeezezza nti kituufu waliwo akabinja k’abavubuka ababba  abantu ababa bagenze okugula ebintu mu katale naye nga bakola ekisobooka okulaba nga babalwanyisa ng’abamu mu bazze bakwatibwa nga bali Luzira ne Kitalya .

Asp Rogers Musana akulira poliisi y’oku kaleerwe yategeezezza nti abavububa bangi mu butale abeefuula  abasuubuzi n’ekigendererwa ky’okubba  nga poliisi egenda ebakwata ne batwalibwa mu mbuga z’amateeka kyokka abamu oluyimbulwa ne batandikira we baakoma  ng’obubenje obugwa ku kaleerwe be basookawo ne banyagulula abagudde ku kabenje