Ab’e Sentema bafunye ekifo awalabirirwa abaana abaliko obulemu

Abazadde b’abaana abaliko obulemu abawangaalira ku kyalo Sentema, mu ggombolola y’e Kakiri mu disitulikiti y’e Wakiso, bafunye akaseko ku matama oluvannyuma lw’okufuna ekifo eky’obwereere we basobola okuleka abaana baabwe. 

Emmanuel Okwalo ne mukyala we Bridget Nabirye abaawaddeyo ekifo ky'abaana

St. Johns Sentema children’s shelter, ekisangibwa ku ssomero lya Sentema Church of Uganda Primary school kyagguddwaawo ku Lwomukaaga oluwedde. Ekifo kino kigenda kulabirirwamu abaana abaliko obulemu naddala abo abalina Cerebral Palsy (CP) ekiva ku kukosebwa mu bwongo ng’omwana azaalibwa oba nga yaakazaalibwa. 
Abaana abo abasing bagongobala. Babeera tebasobola kutambula bulungi, okutuula, okweriisa n’okweyamba ku lwabwe. 
Ekifo kyaweereddwaayo Bridget Nabirye n’omwami we Emmanuel Okwalo nga bano baabadde beebaza Katonda n’okukuza amazaalibwa ga muwala waabwe Zion Elizabeth Janelle eyawezezza emyaka 10 nga December 5, 2025.  Janelle yafuna CP nga yaakazaalibwa era okuva olwo, bazadde be bayise mu bingi okumulabirira. 

Rebecca Nankanja akulira essomero ng'ali munda mu shelter

Bwe baabadde batongoza ekifo kino, Rev. David Luyombya okuva mu Bukasa Parish ne Rev. Sedrach Kamulegeya okuva ku St. Johns Sentema Church of Uganda beebazizza Nabirye ne bba olw’okufaayo eri abaana abaliko obulemu n’abazadde baabwe.
Era baasiimye ne Rebecca Nankanja, akulira Sentema C/U Primary School olw’okuwaayo ekizimbe awaatereddwa ‘shelter’ y’abaana.  
“Okulabirira abaana bano si kyangu,” Nabirye bwe yagambye n’agattako nti bayise mu kusoomooza kungi emyaka 10 egiyise era nga kino kyabawalirizza okuyamba abazadde nga babateerawo we basobola okuleka abaana baabwe olwo ne basobola okugenda okukola nga tebeeraliikirira. Wabula omuzadde alina okuwaayo ppampa n’emmere y’omwana buli lw’amutwalayo ku makya. 
Nabirye agamba nti ekifo kyabamazeeko obukadde busatu (sh3million) nga zino baazisonze okuva mu bakozi banne, emikwano ne ffamire. Baasiize langi n’okugula ebyokuzannyisa, emifaliso, obutebe n’ebibayambako okutambula. 

Shelter yatongozeddwa ku wiikendi

Nankanja yasabye abazadde okukomya okukweka abaana abaliko obulemu wabula babatwale ku shelter babeere ne bannaabwe.
Samalie Nanvunanwa, akulira ‘special needs and inclusive education’ ku disitulikiti y’e Wakiso yawadde ekifo kino omusomesa omukugu mu by’okulabirira abaana abaliko obulemu. 
Ebyo nga bikyali awo, Uganda erimu abaana abaliko obulemu akakadde kamu n’emitwalo nsanvu (1.7million) nga bali kitundu ku bannayuganda obukadde butaano n’emitwalo ataano (5.5million) abaliko obulemu.