Abe Nakaseke bafunye ez'okuzimba ekitone

GGOMBOLOLA ya Nakaseke eyolekedde okuwona obupangisa eve mu bizimbe by'embuga ya Kabaka mwemaze emyaka egisoba 40 oluvannyuma lw'okufuna obukadde obusoba 300 okuzimba ekitebe.
Omukolo gw'okutema evvunike okuzimbe ekitebe ky'eggombolola gubadde ku kyalo Nabbiika mu muluka gwa Kyamutakasa mu Nakaseke nga gukuliddwa RDC wa disitulikiti eno Capt Yahaya Kakooza.
Kakooza asiimye abakulembeze b'eggombolola okubeera abayiiya ne bagula ettaka okugenda okuzimbibwa ekitebe n'asaba aba kampuni ya Maseka Engineering Works Ltd abaawangudde kontulakita obutabuusa baana ba ku kitundu mirimu n'okwewala okukola gadibengalye.
Ssentebe wa disitrulikiti ye Nakaseke Ignatius Kkoomu Kiwanuka asabye abatuuze okwongera okukola ennyo batambule n'enkulaakulana ezitandise okujja mu kitundu omuli amazzi n'amasannyalaze.
Ssentebe w'eggombolola ya Nakaseke Eric Migadde  ategeezezza nti baabawadde obukadde 150 ez'omutendera ogusooka ogukoma ku kusereka n'asiima abakulembeze abaabayambyeko okusaka ensimbi zino.