Ab'e Kampala bali mu keetalo okwaniriza Kaggo, omwami wa Kabaka atwala Kyaddondo
Tulina essanyu okulaba nga tugenda ku kyaza Omwami wa Kabaka ow' essaza lya Kyaddondo - H.E Sheikh Abdallah Ssemmambo
Kaggo Agnes Nakibirige Ssempa ng'ayogera ku mukolo ogumu gye buvuddeko
Ng'abantu ba Ssaabasajja Kabaka mu ggombolola Mutuba IV Kampala Masekkati beeteekerateekera okwaniriza Kaggo Agnes Nakibirige Ssempa wamu n'abamyuka be okuli Hajji Magandazi Matovu ne Ronald Mpagi n'olukiiko lw'essaza olukozi ku Lwokusatu nga September-7-2022, abantu abenjawulo okweteekerateekera okulambula kuno.
Sheikh Abdallah Ssemmambo, omumyuka asooka owa Mufti wa Uganda, Sheikh Shaban Ramathan Mubajje ategeezezza nga bwe balindiridde mu ssanyu okukyala kw'Oweekitiibwa Agnes Nakibirige Ssempa-Kaggo.
Bino abyogeredde ku kitebe kya Uganda Muslim Supreme Council e Kampalamukadde bw'abadde asisinkanye Muyunga Stephen, Omwami wa Ssaabasajja Kabaka ow'omuluka Mutuba VI Kampala Mukadde era ssentebe w'abaami b'emiruka mu ggombolola Mutuba IV Kampala Masekkati.
Stephen Muyunga akulira ab'emiruka mu Kampala nga ali ne Sheikh Abdallah Ssemmambo ku ofiisi ye
Aba Uganda Muslim Supreme Council bazze bawagira n'okwenyigira mu nteekateeka z'Obwakabaka, era mu kiseera essaza Kyaddondo we lyakung'aanyiza omusaayi, omumyuka wa Mufti asooka, Sheikh Abdallah Ssemmambo ye yali omugabi w'omusayi omukulu e Kampalamukadde n'enteekateeka ya Luwalo Lwaffe baagiwagira nga bagula satifikeeti.
Kawuma Henry Male, Omwami wa Kabaka atwala eggombolola ya Mituba IV Kampala Massekati ategeezeza nti Kaggo agenda kulambula ebifo bino okuli; Uganda Muslim Supreme Council., Old Kampala Primary School, Sir Apollo Kaggwa Primary School, Lord Mayor n'olukiiko lwe, Central Division, Nakasero mu Katale, KACITA, Nalubwama (okusisinkana abakulembeze ba Tax Park zonna), St. Balikuddembe akomekereze n'olukug'aana lwa bonna ku Fort Lugard - Kampalamukadde.
Kaggo agenda kulambula emirimu abantu ba Kabaka gye bakola ate nga bw'abatuusako obubaka obuva ku ssaza wamu n'okubanjulira enteekateeka y'okuzimba ekisaawe kya ttiimu y'essaza Kyaddondo wamu n'okwebaza abantu abazze bawaayo amakula wamu n'oluwalo.