Abe Isingiro balaze ebikoleddwa NRM

ABAKULEMBEZE ba Disitulikiti y’e Isingiro bajaguzza olunaku lwa NRM mu ngeri y’okwanjulira abantu ebintu ebikoleddwa omubadde okuzimba amasomero, eddwaaliro n’olutindo ebibalirirwamu obuwumbi butaano n’okusoba.

Abakulembeze bano baakulembeddwamu minisita w’ebyemagana, Lt. Col. Dr. Bright Rwamirama, ababaka Stephen Kangwagye (Bukanga North) Nathan Byanyima (Bukanga Country),Ham Arinitwe (Isingiro West), Alex Bakunda (Isingiro South) n’omubaka omukazi owa Isingiro, Clear Mugumya, ng’okutongoza pulojekiti kwatandise Lwakuna nga baasoose na kuggulawo essomero lya Murema Muslim School.
Bagguddewo ekifo ekirongoosezebwamu abalwadde n’amayumba g’abasawo ate n’okuggulawo essomero lya Rwamurunga.

Ate ku lwa January 26 baasoose n’olukiiko mwe baakubaganyirizza ebirowoozo okulaba nga bakwatagana ng’abakulembeze era oluvannyuma bagguddewo essomero lya Kakoni pulayimale n’olutindo lwa Nyamuyanza. Rwamirama yasabye abantu b’e Isingiro okusigala ku mulamwa n’ategeeza nti n’oluguudo lwa Kabingo Rakai ne Kigagati Kitwe zigenda kukolebwa.

Ababaka baasiimye ebikoleddwa ne bategeeza nti kikola amakulu mu kukuza ennaku enkulu nga luno kubeere kuwaayo mbalirira n’okwanjula ebikoleddwa. Ssentebe wa Disitulikiti y’e Isingiro, Alon Turahi yategeezezza nti okukwataganira awamu basobodde okukozesa obulungi sente y’omuwi w’omusolo