Uganda Martyrs, Mbarara, baatambuza ebisigarira by’abajurizi abaafeereire ediini

Eli Akiza.
N’ekigyendererwa ky’okwegaita aha baikiriza abandi omu ihanga okukuza hamwe n’okwijuka abajurizi abaafeereire ediini, abaikiriza aha kereziya ya Uganda Martyrs baagiraho Misa y’omutaano eyaaba eyebembeirwe Rev. Fr. Didas Kasapuri, ori Bwana Mukuru wa ‘Parish’ egi.

Abaikiriza ba Uganda Martyrs Parish barikushuuma omururembo Mbarara kutambura obwo barikukuza ekiro ky'abajurizi eriizooba ebiro 03.06.2024. PHOTO: Eli Akiza

Bwanyima y’okushaba, aba baatambuza ebisigarira by’abajurizi ebi batungire omu mwaka gwa 1948 okwetooroora orurembo rwa Mbarara, obwo barikushaba eshaara hamwe n’okweshongora nk’akamanyiso ka rukundo ah’abajurizi obwo omusaaserodooti akiriize ebisigarira by’abajurizi ebi batungire omu gwa 1948 arikuhwerwaho omudiikoni Trust Ambrose.

Rev. Fr. Didas Kasapuri naagira ngu, ogu n’omugyenzo ogu barikukora buri mwaka, bo nka ‘parish’ erikweterwa eizina ry’abajurizi kandi ngu nibakyesiimisa.Batakagiire mukutambura, baabanza omu Misa y’omutaano ahi Fr. Kasapuri yaashaba abaikiriza okuhamya okwikiriza kwabo barikutooreza abajurizi.

Goodluck Martinson Atwooki, orikwebembera ekibiina ky'aba 'scout' ahari Uganda Martyrs Primary School, Mbarara, ari omukutambura kw'okujaguza ekiro ky'abajurizi ba Uganda eriizooba ebiro 03.06.2024 omururembo Mbarara. PHOTO: Eli Akiza

Kare ho, eishomero rya Uganda Martyrs Primary School, Mbarara, ryagiraho okutambura barikwetooroora Orurembo Mbarara kukuza ekiro ky’abajurizi. 

Tumuhairwe Fredrick, mukuru w’eishomero eri yaagira ngu nabo baine okwesiima ahabw’eishomero kwetererwa abajurizi ba Uganda. Yaayongyera yaamanyisa ku baine kuteeraho abeegi baabo omusingye gw’ediini n’okwikiririza omuri Mutima-Orikwera bakiri bato.

Fredrick Tumuhairwe, Heedimasita wa Uganda Martyrs Primary School, Mbarara, ayebembeire eishomero rye omukutambura okw'okukuza ekiro ky'abaafeereire ediini omururembo Mbarara eriizooba ebiro 03.06.2024. PHOTO: Eli Akiza

Rev. Fr. Didas Kasapuri yaagira ngu okwikiriza n’ekikwato kikuru ky’omukristo weena kandi yaahiga abaikiriza kushabirana.
Buri mwaka aha biro 03/06 ensi yoona neyegaita aha ihanga Uganda kukuza ekiro kya abajurizi abaafeereire ediini okuruga 1885 okuhisya 1887 omu butware bw’omugabe (Kabaka) Mwanga owa Buganda.

#WestUpdates