‘Uganda kukwatanisa n’amahanga agandi omubya sayansi,’ – Purezidenti Museveni

‘Uganda kukwatanisa n’amahanga agandi omubya sayansi,’ – Purezidenti Museveni

N’ebya Angella Naturinda

Purezidenti Yoweri Museveni yaasiima omurimo ogu Cuba eriyo nekora omukuhwera eihanga rya Angola kuruga omubutegyeki bwa Portugal.

Ebigambo bya Purezidenti biri omubutumwa bwe omu rukiiko orw’ekigombe ekya G77 oruriyo niruhindira omu rurembo orukuru orwa Havana omuri Cuba.

Omuhwezi wa Purezidenti, Jessica Alupo, ojwekyeire Purezidenti Museveni omu rukiiko rw’ebiro bibiri niwe yashoma obutumwa obu.

Ekigombe kya G77 kirimu amahanga 134 agariyo nigatunguuka omunsi yoona. Ekitongore eki kigyendereire okuhwera amahanga agariyo nigatunguuka kutunguuka omuby’entaasya kubaasa kwejumba omuncwamu omukitongore ky’amahanga goona ekya United Nations.

Orukiiko orw’omwaka ogu ruri ahansi y’omutwe, “Omugasho gwa sayansi, tekinologiya n’okuhanga-hanga omumahanga agariyo nigatunguuka”.

Purezidenti hoona asiimire gavumenti ya Cuba ahabw’okutsindika abashaho omu Uganda abahwereire omukutandiikaho eitendekyero erya Mbarara University of Science and Technology (MUST).

Purezidenti Museveni hoona agarukire yaragaanisa okukwatanisa n’amahanga agandi kutunguura ebya sayansi, tekinologiya n’eby’okuhanga-hanga.

#WestUpdates