Pooriisi yakwata emotoka ebaire neyibirwamu amatungo – Kyegegwa

Pooriisi yakwata emotoka ebaire neyibirwamu amatungo – Kyegegwa

N’ebya Phillip Murangira

Pooriisi omu disiturikiti ya Kyegegwa yakwata emotoka y’ekiika ekya Ipsum namba UAS 088Q erikugambwa kuba ebaire neyejunisiibwa kwibiramu amatungo omuri Kyegegwa na disiturikiti ya Kazo.

Motoka egi bagishangamu ente y’enyibano eyibirwe omu faamu ya Ernest Mwenge, omutuura w’ekyaro ekya Kyangoma, omuruka gwa Karwenyi omugomborora ya Ruyonza omu disiturikiti ya Kyegegwa

Nikigambwa ngu ente egi bagiiba burikusheeshaa eriizooba nikwo pooriisi n'abatuura kwirukanga aha motoka ebaire egyegwiire barikwejunisa motoka naza piiki bakahendera bagikwatiire omuri Nabingola omu disiturikiti ya Mubende ahi abaaba bagirimu kugigurukamu bakairukanga bakagitsigaho.

Ente y'enyibaano eyashangwa omu motoka egi..(Photo by Phillip Murangira)

Abatuura ba Karwenyi nibagira ngu bosiire barikureeba emotoka egi omubwiire bwa nyekiro erikurabarabamu.

SSP Godfrey Ninsiima, Omuduumizi wa pooriisi ya Kyegegwa naagira ngu obushuma bw'amatungo bweyongyeire omuri Kyegegwa ngu kwonka nka pooriisi behaireyo kukwata empendabiragiro abanyangaraize abatuura.

Omu wiiki egi yonka, pooriisi ya Kyegegwa ekwatsire ente ibiri ezibaire zibirwe omuri Migina omu disiturikiti ya Kazo, ezi bakwatsire n'omutsigazi omanyirwe nka James obaire nazifunya arikuzitwara omu tauni ya Kyegegwa.

#WestUpdates