Owa boda-boda agwire omu mugyera gwa Rwizi yaafa.

N’ebya Bruno Mugizi

SHEEMA

Pooriisi omu disiturikiti eya Sheema eriyo necondooza nk’oku omuvugi wa boda-boda agwire omu mugyera gwa Rwizi akafa.

Martial Tumusiime, Omugambirizi wa Pooriisi ahabw’ekyanga ekya Bushenyi empango ahamize amakuru aga. Eki kibaireho ebiro 07/11/2023 omu kyaro ekya Ruyonza omu muruka gwa Kyempitsi omu tauni kanso ya Shuuku omu disiturikiti eya Sheema.

Omugyenzi amanyirwe nka; Tumwesigye Junior, 26, omuvugi wa boda-boda kandi omutuura w’omu kyaro kya Kyenjojo omuri Kyempitsi West, omu disiturikiti eya Sheema.

Nikigambwa ngu omugyenzi aheererukire kureebwa asinzire omu tauni ya Kishaabya aha biro 01/11/2023 omu shaaha z’ekiro beitu ku aherize yakwata piki piki ye yaaza omu tauni ya Nyeihanga omu disiturikiti eya Rwampara aha baara ya V8 bar shaaha nka 11 z’akasheeshe. Abakozi b’omu baara ya V8 bamuzibiire kutaahamu ngu ahabw’okuba obwire bubair bwahwireyo. 

Tumwesigye agarukire yaaza aha piki ye arikuzongazonga kandi piki ye ahikire yagisiga haihi n’ebaara ya V8.

Omushango gw’okubura gwe guhababirwe aha Pooriisi ya Shuuku ebiro 01/11/2023 shaaha 7 z’eihangwe kuhisya nyomwebazyo obu ashangirwe afiire omutumbi gwe gurikuzeerera aha mutwe gw’amaizi omu mugyera gwa Rwizi aha nsharo ya disiturikiti eya Rwampara na Sheema.

Okurugiirira ahari Martial Tumusiime, omutumbi gwe gubaire gutariho kironda kyona kandi gubaire gwatandikire kujunda.

 Naagira ngu omutumbi guhairwe abanyabuzaare be kuguziika obwo okucondooza kurikugumizamu.

#WestUpdates