Orurembo rwa Mbarara rutungire miriyooni 500 z’okukora orutindo rwa Katete

Orurembo rwa Mbarara rutungire miriyooni 500 z’okukora orutindo rwa Katete

N’ebya Angella Naturinda

Mbarara City:

Minisiture y’eby’enguuto n’entambura ehaire Kanso y’orurembo rwa Mbarara miriyooni 500 z’okukora orutindo rw’akanya-bwanya orwa Katete.

Meeya w’orurembo rwa Mbarara, Robert Mugabe Kakyebezi naagira ngu Gavumenti ekaba ebahaire biriyooni 5.7 kukora orutindo rwa Katete beitu esente ezi zikashazibwamu bwanyima ya Purezidenti kuraagiira Paramenti kuhindura omu mbariirira y’omwaka 2024/2025.

Kakyebezi naagira ngu obwahati, kanso eriyo neronda konturakita w’okukora purogyekiti y’okukora orutindo orw’akanya-bwanya, kandi omurimo ogu nigwija kukorwa omu ameezi 2.

Bonny Tashobya Karusya, Sipiika wa kanso y’orurembo rwa Mbarara nayetomboita ahabwa Gavumenti kushazamu sente ezi yabaire ebaraganiise kukora orutindo agumize ngu bizinesi z’abantu zikakingwa kwiha obu orutindo oru rukingwa okwezi okuhwaire.

Orutindo oru hati nirwejunisibwa aba boda boda n’ab’ebigyere bonka.

#WestUpdates
#RadioWestAt25