Omushaija aitsire abaana 2 ahabw'okugira obutaikirizana n'omukazi we- Kalungu.

N’ebya Simon Masaba

Abatuura b’omu disiturikiti ya Kalungu bagwerirwe akagwe bwanyima y’omushaija kwita abaana be 2. 

George Ssenyondo, 37, naagambwa kuba aitsire abaana 2 ow’emyaka 5 n’owa 3 kandi abaire nayenda n’okwita owa kashatu.

Ssenyindo obwahati ariyo naragurirwa ah’eirwariro erya Kyamulibwa Health Centre IV, omu disiturikiti ya Kalungu omu kyanga ekya Masaka empango ahagati y’oburinzi bwa Pooriisi.

Ekikorwa ky’obwinazi eki kibaireho ebiro 02/09/2023 shaaha nka 5 z’akasheeshe obu ceeyamaani w’ekyaro kya Lwanume, Mutebi Akaya amanyire amakuru aga okurugiirira aha mugambirizi wa Pooriisi, Fred Enanga.

Enanga agambire ebi Orw’okubanza ebiro 04/09/2023 obu abaire nagambaho n’abanyamakuru aha kitebe kikuru kya Pooriisi omuri Naguru, Kampala.

"Emitumbi y’abaana 2 ogw’omwojo n’omwishiki eshangirwe enagirwe ahansi y'omuti gw'omuyembe. Hoona nabwo haihi n’omuti ogwo, habaire hariyo omwana wa kashatu w’omwishiki w’emyaka 2 ajwire ekiteeteyi kirikuukura abaire ariho narira,” Enanga arikushoborora. 

Enanga naagira ngu Pooriisi ya Kyamulibwa omuri Kalungu etaahire omunshonga egu nikwo kutandikira kurondereza oburugo bw’abaana aba.
 
Naagira ngu okucondooza kutungire akakumu ahari ishe w’abaana aba, George Ssenyondo- omuhingi kuruga omu tauni kanso ys Lwengo omu disiturikiti eyaLwengo.

Nikigambwa ngu ebi byona biretsirweho obutaikirizana obu Ssenyondo agizireho n’omukazi we, Namirimu Florence kuruga Lwengo ou yaataanire nawe.

Omu kavuyo ako, Ssenyondo ashaziremu kutwara abaana be 3 omu maka ga nyinenkuru bo omuri Kalungu kuba niyo batuura.

Beitu hoona, nyinenkuru agizire ngu abaire ataine by’okureebereza abaana abo nikwo kwanga kubakiira. Ogu ahabwire Ssenyondo okubatwara omu maka g’eishenkuru.

Omu kavuro k’okufurira abaana aba, Ssenyondo atungire ekiteekateeko ky’okwita abaana nawe arikwenda kweyita.

Enanga naagira ngu okucondooza omu nshonga egi kuriyo nikugyenda omu maisho.

#WestUpdates