Omushaija agwire omu kiina ky’amaizi yaafeeramu - Mbarara.

N’ebya Christopher Ahimbisibwe

MBARARA

Abantu abarikutuura omumwanya oguri ahaifo ya 'bus' paaka omu rurembo orwa Mbarara bagwereirwe akagwe bwanyima y’omushaija omanyirweho erya Mukiga ryonka kufeera omu kaziba aku babaire nibaihamu amaizi g’okwozya ebiruka aha mwanya ogu barikwogyezamu ebyiruka.

Ekiina kya fuuti 70 eki Mukiga agwiremu akafeeramu. Photo by Christopher Ahimbisibwe.

Akagwe aka kabaire shaaha nka 10 z’omwabazyo gw’orwakabiri ebiro 29/08/2023.

Okurugiirira aha beereebeire n'agaabo hamwe n'abatwire nibakoresa omwanya ogwo, nibagira ngu omugaiga otarikumanywa maziina akatimba akaziba ka fuuti 70 nikwo kutayo pampu y’okureeta amaizi obwo erikukoresa amashanyarazi.

Pooriisi kuruga aha kitebe kikuru kya Mbarara ehikire aha mwanya ogu kwonka tikigyanguheire kuza kwihayo omuntu ogu bwanyima y’okushanga ngu ahansi omu kiina eki habaire hariyo ekyoya kingi hamwe n’amashanyarazi.

Ababaire nibakora na Mukiga nibagira ngu abaire agiire kuteereza pampu ebaire yaagiramu obuzibu.

Abantu barikureeba ekiiba ekiina eki Mukiga agwiremu omuri Mbarara. Photo by Christopher Ahimbisibwe.

Abatuura abarikukorera omu mwanya ogu nibajumiirira ekikorwa eki kushanga ngu omugaiga nabaasa kutiimba ekiina kiringwa nk’ekyo omu tauni kandi akagaruka akatamu amashanyarazi n'okukoresa abantu abataine bukugu n’eby’okwerindisa. 

Aba nibashaba kanso y’omu rurembo rwa Mbarara okurugayo ekafubira mukama w’omwanya ogu.

Pooriisi eihireyo omutumbi gw’omushaija ogu nikwo kugutwara omu kabafu ah’eirwariro erya Mbarara kwongyera kukyeberwa.

#WestUpdates