Omukazi owaahenzire ekiragaano ky’obushwere n’ow’okukomwa ameezi 6

N’ebya Andrew Tushabe na Charles Etukuri

Fortunate Kyarikunda, omunyabiragiro omu tauni kanso ya Rubanda naija kumara ameezi 6 omukihome ahabw’okuremwa kushashura sente zirikuhika shiringi 14,100,000 ahawaabeire ari omukundwa we bwanyima y’okuhenda endagaano y’obushwere.

Omuramuzi wa kooti enkuru omuri Rukungiri, Dinah Nekesa, ebiro 11.03.2026, akaragiira ku Kyarikunda oteebwa omukihome kya gavumenti ekya Rukungiri kumara ameezi 6 ahabw’okuremwa kushashura sente za Richard Tumwine, omushomesa wa purayimare.

Omukw’okubanza omugwa 2023, kooti y’omuramuzi omuri Kanungu ekaragiira Kyarikunda kushashura sente za Tumwine zirikuhika shiringi 9,439,100 ezaahwereire omukushoma obwo ababiri aba boorekyereire kuza hamwe omubushwere.
Eki kikaijaho bwanyima ya Tumwine kuha obujurizi omumbuga z’ebiragiro burikworeka ku yaakoreise sente kushashurira Kyarikunda aha Law Development Centre. 

Omuramuzi ow’eidaara ry’okubanza owa Kanungu, Asanasio Mukobi akacwamu ngu bwanyima ya Kyarikunda kuremwa kuhikiiriza endagaano y’okuza omubushwere na Tumwine, nyamushaija akaba aine obugabe bw’okugarukana sente ze, ezi yaamumariireho arikumushomesa na sente ezindi ezirikuhika shiringi 1,000,000 ahabw’okuteganisibwa n’okuguubwa kubi oku yaarabiremu.

Kyarikunda tarayehorizeho nangwa n’okuribata omumbuga z’amateeka kuhurira emishango eyaabaire emuriho. 

Kyarikunda akaija yaahayo okuhakanisa ahancwamu ya kooti ebiro 17.03.2023 arikurabira omubanyabiragiro aba Nasike and Co Advocates, yaashaba ngu encwamu eyaakozirwe kooti y’omuramuzi eya Kanungu (civil suit number 024 of 2022) eshazibwemu. 

Eki akakikora arikugira ngu taratungire kumanyisibwa kwona omubutongore kandi tarabaasize kutayo okwehozaho kwe ahabw’okuba esimu ye ekaba einwe mwine nyina, Rhona Atukwasa. 

Beitu hoona ebiro 25.05.2025, omuramuzi w’eidaara ry’okubanza owa Kanungu, Mukobi, akabinga okushaba kwa Kyarikunda yaamutaho na mutiikye. Kooti ekashanga ngu Kyarikunda akanga kureebeka omumbuga z’ebiragiro, we n’abahoreereza be. 

“Omubugufu, kooti yaashanga ngu omuntu ogu owaaha okushaba kwe, yaayesingisa omushango gw’okusherura oburingaaniza. Kaingi agumire nayanga kwija omu kooti, we n’abahoreereza be. N’obu baraabe nibashaba oburingaaniza n'okuhurirwa, tibarikwenda okushaba kwabo ku kuhurirwa… Eki nikitangaaza kandi nikiteekwa kuba nikirugiirira ahakushwara okurikureetwaho omushango oguhababirwe. Oburingaaniza ti bwa nyakwehozaho wenka beitu na kitabaaza ashemereire kubutunga,” encwamu nikwo erikushoma.

Omuhoreereza wa Tumwine, Erasmus Nabimanya, akaakiira encwamu egi agumize ngu Tumwine ashemereire kutunga oburingaaniza. Akongyera yaakyoreka ku okubura kwa Kyarikunda omumbuga z’ebiragiro kwabeire nikworeka ku abuzirwe okwehozaho okurimu omuhoho oku yaabaire naabaasa kuhayo.

Ahi byatandikiire…
Tumwine na Kyarikunda, bombi abaabeire bari abashomesa, bakatandika kukoragana hamwe omugwa 2015 ah’ishomero rya Kiringa Primary School omugomborora ya Kambuga kandi baaragaana omugwa 2018 kuza hamwe omubushwere. 

Omubwire obwire obwo, Tumwine akashagika Kyarikunda, omumuringo gwa sente, kubaasa kumariira diipuloma ye y’ebiragiro ahari Law Development Centre omuri Kampala. Tumwine naagira ngu akakoresa sente zitari hansi ya shiringi 9,400,000.

Tumwine akamanyisa embuga z’ebiragiro ngu bwanyima ya Kyarikunda kumara emishomo ye, abakundaine aba bakaikirizana kutebeekanisaho omukoro gw’okwanjura, ogwabeire guri ogw’okubaho omukwezi kwa kabiri omugwa 2022. Embariirira y’esente z’omukoro ogu ekakorwa obwo omukoro guri ogw’okubaho omukwezi nikwo kumwe. 

Omuzeeyi…
Beitu hoona Kyarikunda akaija yaayehindurira Tumwine, ogumize ngu ni mukuru munonga; ngu kandi nabaasa kwija kumureetera omuraaro mubi omubushwere, ekintu ekyareeteire Tumwine kumutabaariza omu kooti.

Omuramuzi akagira ngu akashwijuma kandi yaayetegyereza kurungi obujurizi, yaashanga ngu buzima ababiri aba bakaba bari omuri rukundo kandi ngu Tumwine akaba amwoherereize sente z’okushashurira ebishare by’eishomero.

“Okushwijuma okucookire nikworeka sente zirikworezibwa zirikurabira ahasimu zirikuza owa Kyarikunda. Obu n’obwire obu ababiri aba baabaire baine rukundo ey’akabindirano. Sente ezo zikaheebwa Kyarikunda n’amatsiko g’okugira ngu rukundo yaabo neija kugumizamu mpaka omubushwere. Eki tikiraabeireho bwanyima ya Kyarikunda kwanga. Mbwenu Kyarikunda tarikubaasa kuguma na sente za Tumwine kandi akaguma ayangire kuza nawe omubushwere,” omuramuzi nikwo yaacweiremu.

Omuramuzi agizire ngu, “tihariho nshobi etaine mubazi. Abantu abarikuhikwaho enshobi, nka Tumwine ahabw’enshonga egi, baine obugabe kushumbuusibwa,” nikwo agizire arikugyendera ahakiragiro kya 126 (2) (c) eky’engynderwaho y’ihanga eyaahinguziibwe omugwa 1995.

Ekiragiro eki ekyengyenderwaho y’ihanga eya 1995 neegira ngu omumushango ogu, embuga z’ebiragiro zishemereire kureebeka ngu “okushumbuusibwa okurikumara kwaheebwa abo abahikirweho ebibi”. Ekiragiro nikigyezaho kureebeka ngu, kurugiirira ahakiragiro, encwamu z’oburamuzi zishemereire kuta amaani ahakureetaho oburingaaniza ahari abo abahikirweho ebibi, beitu kutari kubonereza owasingwa omushango kwonka.

#WestUpdates